Yaburina.
55.
Dawudaa fala ɲaxumɛna, bɛti baane kuntigin xa. A xa ba kondenne ra. 
Ala, n ma maxandi xuiin namɛ. I nama i xun xanbi so n ma mawugani! 
I tuli mati n na, i yi n yabi. Xaminna bata n suxu han n kuisan 
n yaxune fala xuine fe ra. Muxu ɲaxine n yigbɛtɛnma, e n tɔrɔma. E bata xɔlɔ n ma, e yi n naɲaxu. 
N bata kɔntɔfili. Sayaan gbalon bata n xun matugan. 
Gaxun nun xuruxurunna bata n suxu. Gbalon yi n nabilin. 
Xa gabutɛɛn yi n ma nun alo ganbana, n yi tuganma nɛn nun n sa dɔxɔden fen. 
N yi n gima nɛn, n siga yire makuyeni. N yi lu burunna ra. 
N yi maratangaden fenma nɛn mafurɛn n keli foye gbeen nun gbalon bun. 
Muxu ɲaxine raxuya ayi, Marigina, e fala xuine yifu! Bayo, n gbalon nun yɛngɛn toma taani han! 
Kɔɛɛn nun yanyin na, e taan nabilinma, hakɛn nun yɛngɛne nan taani. 
Kala tiin gboma ayi taani. Bɛsɛnxɔnyaan nun mayifuun nan taani. 
Xa yaxun nan tun yi n makonbima nun, n yi diɲama a bun ma nɛn. Xa n naɲaxu muxun nan tun yi a yɛtɛ yigboma n yɛ nun, n yi n luxunma a ma nɛn nun. 
Koni i tan na a ra, n lanfana, n bodena, n xɔyi kɛndɛna! 
En ma lanfamayaan yi ɲaxun Alaa banxini en yi sigan tima yamaan yɛ waxatin naxan yi. 
Sayaan xa n yaxune ratɛrɛna, e kɛndɛn yi siga laxira yi. Bayo fe ɲaxina e yi e konni. 
Koni n bata Ala xili, Alatala n nakisima nɛn. 
N ma mawugan nun kutun xuina a lima nɛn. Xɔtɔnna nun yanyin nun ɲinbanna ra, a n xuiin mɛma. 
A n niin natangama, n yi keli yɛngɛni hɛrini hali n yaxune to yi wuya! 
Habadan mangana Ala a tuli matima nɛn, a yi n yaxune rabira. Bɛti xuini te. Amasɔtɔ e bata tondi tubɛ. E mɔn mi gaxuxi Ala yɛɛ ra. 
N lanfana a xɔyine yɛngɛma. A a layiri xidixine kalama. 
A fala xuiin ɲaxun fɛnɛn xa koni maraɲaxuna a bɔɲɛni. A fala xuine salaxun alo turena. Koni e sɛgɛn tima alo silanfan xɛnxɛna. 
I ya kɔntɔfinle lu Alatala ma. A i malima nɛn. A mi tinɲɛ tinxin muxun yi bira mumɛ! 
Koni i tan, Ala, i na muxu faxane nun wuledene faxama nɛn benun e siin tagiin xa a li. N tan mabinni, n na n yigi sama i tan nin.