Yaburina.
56.
Dawudaa maxandi ɲaxumɛna. Bɛti baane kuntigin xa: a xa ba alo bɛtin naxan xili, “Ganban Wudi Makuyeni” a naxan ba Filisitine to a suxu Gati taani. 
Ala, kininkinin n ma amasɔtɔ e n yɛngɛma. N yaxune n bɛsɛnxɔnyama fɛriɲɛn gbɛn! 
Fɛriɲɛn gbɛn n yaxune n yɛngɛma. N yɛngɛfane bata wuya ayi, e waso. 
N na gaxu waxatin naxan yi, n na n yigi sama i tan nan yi. 
N na Alaa fala kamalixine matɔxɔma, n yi n yigi sa a yi, nanara n mi gaxuɛ mumɛ! Daɲɔxɔn dɔrɔnna nanse ligɛ n na? 
Fɛriɲɛn gbɛn n yaxune n tɔrɔma. E n ɲaxankata feni tɔnma waxatin birin! 
E e malanma luxundene yi, e yɛɛne tixi n na, n nɛɛn dɛdɛ. E yengi a ma e n faxɛ. 
I nama tin e rakisi feen ma e fe ɲaxine ma. Ee! Ala! I xɔlɔxin xa na muxune rabira. 
N ma sunun yatɛ. N yɛɛgena fe xa rabira i ma. I xaxili mi dɔxi e xɔn ba? 
N na i xili waxatin naxan yi, n yaxune xɛtɛma n fɔxɔ ra nɛn, n yi a kolon a Ala n xɔn. 
N na Ala matɔxɔma a falane fe ra! N na Alatala matɔxɔma! 
N yigi saxi Ala nin, n mi gaxuɛ mumɛ! Adamadiin nanse ligama n na? 
Ala, n dɛ xuiin naxan tongoxi, n na a rakamalima nɛn. N na barika bira saraxan bama i xa nɛn. 
Amasɔtɔ i bata n ba sayani, i yi n natanga biran ma. Nanara, n sigan tima Ala yɛtagi n ma siimayani.