Yaburina.
62.
Dawudaa bɛtina, bɛti baane kuntigin xa Yedutun xa. 
N bɔɲɛn saxi Ala nan baraka yi, a tan nan n nakisima. 
A tan kedenna nan n kantan fanyen na, n nakisimana. N ma faran makantanxin nan a ra. Yaxune mi n nɔɛ mumɛ! 
Han waxatin mundun yi, ɛ luyɛ fuyɛ muxune ma? Ɛ tan e rabirama alo banxi xɔnna hanma langa fonna? 
E waxi muxune ragodo feni tun, keli a binyeni. E e yoron wuleni. E duban tima e dɛni, koni e dangan tima e bɔɲɛni. 
N bɔɲɛ xunbenla sɔtɔma Ala nan xɔn. A tan nan n yigin na. 
A tan nan n kantan fanyen na, n nakisimana. N ma faran makantanxin nan a ra. Yaxune mi n nɔɛ mumɛ! 
N ma kisin nun n ma binyena Ala nan yii. N kantan fanyen sɛnbɛmaan nan Ala ra. N ma yigiyana a tan nan na. 
Yamana, ɛ ɛ yigin sa a yi waxatin birin! Ɛ yi ɛ kɔntɔfinle so Ala yii, amasɔtɔ en yigiyaden nan Ala ra. 
Adamadiine ligaxi nɛn alo foyedina. A xungbeen nun a xurina, sese mi e ra. Hali e rate sikeela fari, e yelefu. E malanxin yelefu foyedin xa. 
I nama i yigin sa gbalo feene yi. I nama i waso se muɲaxini. Hali nafunla gbo i yii han, i nama i yigin sa a yi! 
Ala luma a falɛ, fa fala a tan nan gbee fangan na. 
I gbeen nan hinanna ra, n Marigina. Bayo i tan muxun kɔntɔnna fima nɛn alo a kɛwanla.