Yaburina.
65.
Dawudaa bɛtina, bɛti baane kuntigin xa. Sigi sariɲanxina. 
Ala, a lan yamaan yi i tantun Siyon yi, nxu mɔn yi nxu dɛ ti xuine rakamali. 
I tan naxan maxandi xuine ramɛma, muxun birin fama nɛn i fɛma. 
Hakɛne to sɛnbɛn sɔtɔ nxu xun ma i yi nxɔ matandine mafelu. 
Sɛwan ne xa, i bata naxanye sugandi e xa lu i konni! Nxu bata lugo i ya banxin fe faɲine ra, i Batu Banxi Sariɲanxina. 
I nxɔ maxandin yabima kabanakoon nan na tinxinni. Ala nxu rakisimana, bɔxɔn danna muxun birin yigina i tan nan na, e nun naxanye fɔxɔ igen kidi ma pon! 
I sɛnbɛn bata geyane da bayo fangamaan ni i ra. 
I bata baan xuini ti, i yi a walanne raxara. I mɔn yi siyane masabari. 
Dunuɲa birin gaxuma i ya kabanakone yɛɛ ra. Keli sogetedeni han sogegododeni, e birin bɛtin bama i xa sɛwani. 
I yengi dɔxi bɔxɔn xɔn i yi tule igen sa a ma, han a ramɔ. Alaa xuden nafexi igen na, alogo donseen xa sɔtɔ. I tan nan na ragidixi. 
I tule gbeen nafama xɛɛ bixine ma bɔxɔn yi xunbeli, a yogon igen na. I tan barakan sama xɛɛni, a sabati. 
Xɛɛ xaba waxatini, i ya fanna warama ayi nɛn. I na dangu dɛnaxan yi, mɛnna yi sabati. 
Fixɛne fanma e nun fiile. Geyane rayabuma nɛn han! 
Xuruseene yiriwama nɛn fixɛne ma. Lanbanne yi rafe siseene ra. Na birin yi findi bɛti ba xunna ra e nun sɛwa sɔnxɔna.