Yaburina.
71.
Alatala, i tan nan n luxunden na. I nama tin n yi yagi! 
N natanga i yi n xunba amasɔtɔ i tinxin. I tuli mati n na i yi n nakisi! 
Ala, findi n kantan fanyen na, n luxundena, n luma sigɛ dɛnaxan yi. Yamarin fi, i yi n nakisi. Amasɔtɔ, n kantan fanyen nun n ma yinna nan i tan na. 
N ma Ala, n natanga muxu ɲaxine sɛnbɛn ma, i n ba hakɛ kanne nun gbalotɔne yii. 
N Marigina Alatala, n yigin na i tan na. N bata n yigin sa i yi xabu n dii ɲɔrɛyani. 
I n masuxi xabu n yi n nga kui waxatin naxan yi. I tan nan a liga n yi bari, nanara n ni i tantunma. 
N findixi misaala nan na a wuyaxi xa, amasɔtɔ n yigiya sɛnbɛmaan nan i tan na. 
N ni i tantunma nɛn fɛriɲɛn gbɛn! N yi i ya nɔrɔn matɔxɔ. 
I nama i mɛ n na amasɔtɔ iki, n bata fori. I nama n nabeɲin amasɔtɔ n fangan bata ɲan. 
N yaxune n mafalama. Naxanye waxi n faxa feni, ne e bode toma. 
E naxa, “Ala bata a rabeɲin. En siga a fɔxɔ ra en yi a suxu. A xunba muxu mi na yi.” 
Ala, i nama i makuya n na. N ma Ala, i mafura, i fa n mali! 
Ala xa ne yarabi, e ɲan, naxanye n kansunma. Ala xa ne yagi, e xun nagodo naxanye waxi n maxɔlɔ feni. 
N xaxili tixi i ra tun! N mɔn sigama i tantunɲɛ tun! 
N ni i ya tinxinyaan matɔxɔma nɛn fɛriɲɛn gbɛn! E nun i ya marakisina, hali n to mi e birin kolon. 
Marigina Alatala, n fama i sɛnbɛn barakani, n ni i tan keden peen nan ma tinxinyaan matɔxɔma. 
Ala, xabu n xurun waxatin naxan yi, i n xaran nɛn. N mɔn i ya kabanakone matɔxɔma tun! 
Ala, iki, n bata fori, n xunsɛxɛn fan bata fuga. Koni i nama n nabeɲin fɔ n xa i sɛnbɛn nali iki muxune ma, n yi i ya fangana fe yɛba mayixɛtɛ famatɔne birin xa. 
Ala, i ya tinxinyaan bata kore li! I bata kabanako fe wuyaxi liga. Nde ligaxi alo i tan? 
Hali i to tɔrɔn nun xɔlɛ gbeen nafa n ma, i mɔn n niin naxɛtɛma n yi nɛn. Hali n sa gaburun tilinxini bɔxɔn bun, i n natema nɛn mɔn. 
I n ma xunnayerenna ragboma ayi nɛn, i mɔn yi n madɛndɛn. 
N na i tantunma nɛn kondenna ra i ya lannayana fe ra, n ma Ala. N tantun bɛtin bama i xa nɛn bɔlɔnni, Isirayila Sariɲantɔna. 
N sɔnxɔma nɛn sɛwani n nɛma bɛti baani waxatin naxan yi amasɔtɔ i bata n xunba. 
N ni i ya tinxinyaan matɔxɔma nɛn fɛriɲɛn gbɛn! Amasɔtɔ naxanye yi waxi n tɔrɔ feni, ne bata yagi, e yarabi.