Yaburina.
75.
Asafi a bɛtina, bɛti baane kuntigin xa, a xa ba alo bɛtin naxan xili, “I Nama Halagin Ti.” Sigi sariɲanxina. 
Ala, nxu bata i tantun. Nxu i tantunma han! Nxu i maxandima i xinli, nxu yi i ya kabanakone fe fala. 
I naxa, “N bata kiti sa lɔxɔn sa. N kiti faɲin sama nɛn. 
Bɔxɔn xuruxurunma waxatin naxan yi, a niimaseene birin yi xuruxurun, n tan nan a san bundɔxɔn xɔdɔxɔma ayi ken! 
N bata a fala wasodene xa, ‘Ɛ nama ɛ yɛtɛ yigbo!’ N bata a fala muxu ɲaxine xa, ‘Ɛ nama ɛ kanba ɛ sɛnbɛn xɔn! 
Ɛ nama ɛ kanba ɛ sɛnbɛn xɔn kore xɔnna xili ma! Ɛ nama waso falane ti!’ ” 
Amasɔtɔ xun mayɛngɛn mi kelima sogeteden binna xan na hanma sogegododen binni hanma burunna ra. 
Ala nan kitin sama. A yi nde yalagi, a yi nde yoo sa. 
Amasɔtɔ igelengenna suxi Alatala yii, a rafexi a xɔlɛn na alo dɔlɔ xɔdɛxɛna. A a xɛlɛma nɛn, muxu ɲaxine birin yi a min han a ɲan. 
Koni n na a fe falama nɛn bɛtine yi habadan! N yi tantun bɛtin ba Yaxubaa Ala xa! 
A muxu ɲaxine birin fangan kala, a tinxin muxune xunna keli.