Yaburina.
77.
Asafi a bɛtina, bɛti baane kuntigin xa, Yedutun xa. 
N bata n xuini te Ala ma. N bata n ma mawuga xuini te, a xa n xuiin namɛ. 
N yi tɔrɔni waxatin naxan yi, n Marigin maxandi nɛn. Kɔɛɛn birin na, n yi n yiini te Ala ma, koni n mi madɛndɛn. 
Alaa fe to rabira n ma, n kutun. N to n miri a ma, n xaxinla yi yifu. 
N yi xi n yɛɛ ra yi. N xaminxi, n mi fala tima. 
Nayi, n yi n miri waxati danguxine ma e nun ɲɛɛ xunkuyene. 
Bɛtine yi rabira n ma kɔɛɛn na. N yi n miri n bɔɲɛni, n maxɔdinna ti n xaxinli iki: 
“Marigina a mɛma nxu ra nɛn ba, han habadan? Nxu mi fa a kɛnɛnma ba? 
Marigina hinanna bata ɲan ba, han habadan? A tulisaan bata ɲan ba, han habadan? 
Ala bata ɲinan hinanna xɔn ma ba? Ala bata a kininkininna ɲan a xɔlɔni ba?” 
N yi a fala, n naxa, “Naxan n tɔrɔma, na ni ito ra: Kore Xɔnna Ala mi fa a fangan yitama alo a fɔlɔni.” 
Alatala, n xa i ya kɛwanle rabira n yɛtɛ ma. I ya kabanako fe fonne yi rabira n ma. 
N xa n miri i ya wanle ma. N yi n xaxili lu i ya wali gbeene xɔn ma. 
Ala, i ya kiraan sariɲan. Batu se yo mi gbo alo Ala. 
Ala nan i tan na naxan kabanako wanle kɛma. I bata i sɛnbɛn mayita siyane tagi. 
I bata i ya yamaan xunba i sɛnbɛni, Yaxuba nun Yusufu bɔnsɔnne. 
Ala, igene to i to, e yi xuruxurun. Tilinne yi xuruxurun. 
Tulen yi godo keli kore. Galanna yi a xuiin namini kore. Kuyen yi a ɲinna masɔxɔn yiren birin yi. 
I ya kuye sarinna xuiin yi gbo ayi. I ya kuyena ɲin masɔxɔnna yi dunuɲa birin yiyalan. Bɔxɔn yi xuruxurun, a yi yimaxa. 
I ya kiraan yi fɔxɔ igeni. I gidi baa tilinxini, i san fɔxɔne mi toɛ. 
I yi Nabi Musa nun Haruna ti i ya yamaan yɛɛ ra alo xuruse rabaan tima yɛxɛɛ kurun yɛɛ ra kii naxan yi.