Yaburina.
80.
Asafi a bɛtina bɛti baane kuntigin xa, sereyana, a xa ba alo bɛtin naxan xili: “Fuge Faɲine.” 
Isirayila kantan muxuna, i tuli mati nxu ra. I tan naxan tixi Yusufu bɔnsɔnna yɛɛ ra alo xuruse kuruna, i tan naxan dɔxi maleka gubugubu kanne tagi, i yɛtɛ makɛnɛn nɔrɔni. 
I sɛnbɛn yita Efirami nun Bunyamin nun Manase bɔnsɔnne ra. Keli, i fa nxu rakisi! 
Ala, i mɔn xa nxu sɛnbɛ so, i nɔrɔn nagodo nxu ma, alogo nxu xa kisi. 
Alatala, Ala Sɛnbɛn Birin Kanna, i luma xɔlɔxi i ya yamaan ma han waxatin mundun i tondi a maxandin yabɛ? 
I bata e balon findi sɔxɔlɛn na, i yi e igelengenne rafe yɛɛgen na. 
I bata nxɔ bɔxɔn findi yɛngɛ so xunna ra nxu rabilinna siyane xa. Nxu yaxune nxu magelema. 
Ala Sɛnbɛn Birin Kanna, i mɔn xa nxu sɛnbɛ so, i nɔrɔn nagodo nxu ma, alogo nxu xa kisi! 
I fa nɛn wudi binla ra sa keli Misiran yamanani. I siyaan bonne kedi, i yi na wudi binla si e bɔxɔni. 
I yi yirena nde yitɔn a rasoliden na. A salenne yi godo pon! A yi yamanan nafe. 
A nininna yi so geyane xun na. A yiine yi so suman wudi gbeene xun na. 
A yiine yi sigama han fɔxɔ igen xun ma, e mɔn yi sigaxi han baan xun ma. 
Nanfera i a langan kalaxi? I tin dangu muxune birin yi a bogine muɲa? 
Segune yi keli fɔtɔnni, e a kala, burunna subene yi a don. 
Sɛnbɛn Birin Kanna Ala, i mɔn xa fa. I yɛɛ ragodo nxu ma keli ariyanna yi, i yi nxu mato. I ya yamaan nakisi naxan findixi na wudi binla ra! 
I tan yɛtɛɛn naxan sixi, i xa na ratanga! A luxi nɛn alo i tan yɛtɛɛn diin naxan nagboxi. 
E bata a sɛgɛ, e a gan, i ya yamaan kalama i ya xɔlɔn bun ma. 
I yengi lu mangan xɔn ma i tan yɛtɛɛn naxan dɔxi, i tan yɛtɛɛn diin naxan nagboxi. 
Nxu mi fa nxu xun xanbi soma i yi sɔnɔn. Nxu rakisi nanara nxu i tantunɲɛ. 
Alatala, Ala Sɛnbɛn Birin Kanna, i mɔn xa nxu sɛnbɛ so, i nɔrɔn nagodo nxu ma, alogo nxu xa kisi!