Yaburina.
81.
Asafi gbeena, bɛti baane kuntigin xa. A xa ba Gati kaane kondenna ra. 
Sɔnxɔ sɛwani en ma Ala xa, en sɛnbɛna. Ɛ xuini te Yaxubaa Ala xa! 
Ɛ bɛti baan fɔlɔ, ɛ tanbanne maxa, e nun bɔlɔnna nun kondenna. 
Kike nɛnɛn na te, e nun kiken na kɔxɔ, ɛ xɔtaan fe en ma sali lɔxɔne yi. 
Sariyan nan ito ra Isirayila xa. Yaxubaa Alaa yamarin nan ito ra. 
A a so Yusufu a denbayaan yii nɛn a Misiran yamanan yɛngɛ waxatin naxan yi. En yi xuina nde mɛ en mi yi naxan kolon, 
A naxa, “N bata goronne ba ɛ xun ma. Ɛ bata goron binyen dɔxɔ. 
Ɛ yi tɔrɔni waxatin naxan yi, ɛ yi n xili n yi ɛ xunba. N yi ɛ yabi foye gbeeni. N yi ɛ kɛɲaan fɛsɛfɛsɛ Meriba igene yi.” 
“N ma yamana, ɛ ɛ tuli mati n ma maxadi xuine ra. Isirayila, xa ɛ yi n xuiin namɛ nun! 
Ɛ nama Ala gbɛtɛ batu! Ɛ nama ɛ xinbi sin ala gbɛtɛ yo xa! 
Alatala nan n tan na, ɛ Ala naxan faxi ɛ ra sa keli Misiran yamanani. Ɛ ɛ dɛɛne yibi, n xa ɛ ralugo. 
Koni n ma yamaan mi e tuli matixi n na. Isirayila mi tin n na. 
Nayi, n yi e lu e tengbesenyani, e yi bira e waxɔn feene fɔxɔ ra. 
Xa n ma yamaan yi n xuiin namɛ nun, xa Isirayila yi birɛ n ma kirane fɔxɔ ra nun, 
n yi e yaxune yarabima nɛn nun mafurɛn! N yi e yɛngɛfane halagima nɛn. 
Naxanye Alatala raɲaxuxi ne gaxuxine yi e felenma nɛn a bun ma. E tɔrɔn mi yi ɲanma habadan! 
N yi ɛ baloma nɛn malo faɲin nun kumin na.”