Yaburina.
88.
Sigi sariɲanxina. Koraa diine tantun bɛtina, bɛti baane kuntigin xa. A xa ba xulenna ra. Esira yixɛtɛna nde Heman ma fala ɲaxumɛna. 
Alatala, Ala naxan n nakisima, kɔɛɛn nun yanyin na, n gbelegbelema i tan nan na. 
N ma maxandi xuiin xa i li. I tuli mati n ma mawuga xuiin na! 
Tɔrɔ wuyaxi bata n niini li, sayaan bata maso n na. 
E n yatɛma alo naxanye sigama gaburun na. N fangan birin bata ɲan. 
E bata n nabeɲin faxa muxune yɛ, alo muxu faxaxine gaburun na, alo i bata ɲinan naxanye xɔn, i mi fa sese ligama naxanye xa. 
I bata n woli ayi bilingan tilinxin na dimi gbeeni. 
I ya xɔlɔn bata gbo ayi n ma, i n yigbɛtɛnma i sɛnbɛn na. 
I bata n xɔyine makuya n na, i bata n findi se ɲaxin na e yɛɛ ra yi. N balanxi, n mi nɔɛ minɛ. 
N yɛɛne bata wasa tɔrɔn na, n ni i xilima lɔxɔ yo lɔxɔ, Alatala, n na n yiine yibandunma i tan nan ma. 
I kabanako feen ligɛ faxa muxune xa ba? Faxa muxune kelɛ ba, e yi i tantun? 
Muxuna i ya hinanna fe falɛ gaburun kui ba? I ya lannayana fe falɛ halagi yireni ba? 
I ya kabanako feene toɛ dimini ba? Ɲinan tima binbine xɔn dɛnaxan yi, i ya tinxinyaan kolonɲɛ mɛnni ba? 
Alatala, n bata i xili, n mali. N ni i maxandima xɔtɔn yo xɔtɔn. 
Alatala, nanfera i i mɛxi n na? Nanfera i i yɛtagi luxunxi n ma? 
Xabu n dii ɲɔrɛna, n yi tɔrɔni. N yi masoxi sayaan na. Gaxun bata n yili, n yigitɛgɛ. 
I ya xɔlɔ gbeen bata godo n ma. I n kuisan gbeen naxan ti, na bata n halagi. 
Kuisanne n nabilinxi waxatin birin alo fufana, e bata n nabilin yiren birin yi. 
I bata n lanfane nun n xɔyine makuya n na. N fa dimin nan tun kolon.