Yaburina.
89.
Esira yixɛtɛna nde Etani a fala ɲaxumɛna. 
N bɛtin bama nɛn waxatin birin Alatala hinanna fe ra, n yi i ya tinxinna fe fala mayixɛtɛne nun mayixɛtɛne xa. 
N yi a fala a i ya hinanna luma nɛn habadan, a i ya tinxinyaan buma nɛn alo kore xɔnna. 
I naxa, “N bata layirin xidi n ma muxu sugandixin xa, n bata n kɔlɔ n ma walikɛɛn Dawuda xa, 
n naxa, ‘N ni i yixɛtɛne findima nɛn mangane ra waxatin birin, n yi e mangayaan lu han habadan.’ ” 
Alatala, malekan naxanye ariyanna yi ne tantun bɛtin bama i ya kabanakone fe ra, e nun i ya tinxinyana fe ra. 
Alatala, i tan ɲɔxɔn mi na kore xɔnna ma. Nde luxi alo Alatala, alane yɛ? 
Ala magaxu maleka sariɲanxine malanni, naxanye a rabilinxi, a makabɛ ne birin yɛɛ ra yi. 
Alatala, Ala Sɛnbɛn Birin Kanna, nde luxi alo i tan? I sɛnbɛn nun i ya tinxinyana i rabilinxi. 
I tan nan fɔxɔ igen sɛnbɛn natima, a walanne na te, i tan nan e ragodoma. 
I tan nan Misiran halagixi, i tan nan i yaxune raxuya ayi i sɛnbɛn na. 
I tan nan gbee kore xɔnna nun bɔxɔ xɔnna ra. I tan nan dunuɲa daxi e nun a yi seene birin. 
I tan nan kɔmɛn fɔxɔ nun yiifari fɔxɔn daxi. Taboro nun Xerimon geyane sɔnxɔma sɛwani i ya fe ra. 
I sɛnbɛn gbo! I fangan magaxu han! 
I ya mangayaan sɛnbɛ soxi tinxinyaan nun sariya kɛndɛn nan na. Hinanna nun ɲɔndina i kɛwanle birin yi. 
Sɛwan na kanne xa naxanye i batuma bɛtini, e sigan ti kɛnɛnni i yɛtagi, Alatala. 
E ɲaxanma nɛn i xinli waxatin birin, e i ya tinxinyaan binya. 
I tan nan findixi e binyen nun e sɛnbɛn na, i yi nxu xunna keli i ya fanni. 
Amasɔtɔ Alatala nan nxu xun mayɛngɛn na, nxɔ mangan nan Isirayilaa Ala Sariɲanxin na. 
Lɔxɔna nde, i ya tɔgɔndiya muxune fe toon ti nɛn alo xiye, i yi a fala e xa, i naxa, “N bata sɛnbɛn fi sofana nde ma, n bata banxulanna nde sugandi yamaan yɛ. 
N bata Dawuda to, n ma walikɛna. N yi n ma ture sariɲanxin susan a ma. 
N ma fangan luma a yi nɛn, n yi a sɛnbɛ so. 
A yaxune mi a nɔɛ mumɛ, tinxintaren mi a rayarabɛ mumɛ. 
N na a yɛngɛfane halagima nɛn a yɛɛ xɔri, naxanye a raɲaxuma, n yi ne yɛngɛ. 
N ma tinxinna nun n ma hinanna luma nɛn a xɔn, a sɛnbɛn sɔtɔ n xinli. 
N na a mangayaan nasigama nɛn han fɔxɔ igena, a yi nɔɔn ti baane xun na.” 
“A n xilima nɛn, a naxa, ‘I tan nan n Fafe ra, n ma Ala, n kantan fanyen naxan n nakisima.’ 
N na a findima nɛn n ma dii singen na, naxan gbo mangane birin xa bɔxɔ xɔnna fari. 
N hinan a ra habadan! N layirin naxan xidi nxu tagi, na mi kalɛ mumɛ! 
N na a yixɛtɛna nde luma nɛn mangayani habadan! Fanni kuyen daxi, a mangayaan daxi.” 
“Xa a yixɛtɛne mi tin n ma sariyan suxɛ, xa e mi bira n ma sariyane fɔxɔ ra, 
e yi n ma tɔnne kala, e tondi n ma yamarine suxɛ, 
nayi, n na e murutɛ feene saranma e ra nɛn dunganna ra, n yi e ɲaxankata e hakɛne fe ra. 
Koni n ma hinanna luma nɛn Dawuda xɔn, n mi n ma tinxinyaan kalama. 
N mi n ma layirin kalɛ. N na a tuli saxi naxan na, n mi na maxɛtɛ. 
N bata n kɔlɔ n ma sariɲanni n mi wulen falama Dawuda xa, 
a yixɛtɛne luma nɛn habadan, a mangayaan buma nɛn n yɛtagi alo sogena. 
A buma nɛn mangayani habadan alo kikena, naxan kore xɔnna ma taxamasenna ra waxatin birin.” 
Koni i bata i mɛ a ra, i yi a masiga i ra! I bata xɔlɔ i ya manga sugandixin ma han! 
I bata i ya layirin kala i naxan xidi ɛ nun i ya walikɛɛn tagi. I bata a mangaya taxamasenna rabira bɔxɔni. 
I bata a taan yinne birin nabira. I yi a yire makantanxine findi taa xɔnne ra. 
Dangu muxune birin a muɲama, a dɔxɔ bodene bata a raɲaxu. 
I bata a yɛngɛfane sɛnbɛn gbo ayi. I yi a yaxune birin nasɛwa. 
I bata a yɛngɛ so seene sɛnbɛn ɲan. I tondi a maliyɛ yɛngɛni. 
I bata a nɔrɔn ba a yii, i yi a mangaya gbɛdɛn nabira bɔxɔni. 
I bata a banxulanyaan waxatini kala a ma, i yi a rayagi han! 
Alatala, i mɔn i luxunma nɛn nxu ma han waxatin mundun? I ya xɔlɔn luma gbo ayi alo tɛɛna han waxatin mundun? 
A xa rabira i ma a n ma siimayaan mi fa xunkuya. I adamadiine birin daxi nɛn tun ba? 
Nde luma a faxataren na, a yi a yɛtɛ ratanga sayaan ma? 
Marigina, i ya hinanna minɛn, naxan yi na nun, i i kɔlɔ naxan na Dawuda xa i ya tinxinni? 
Marigina, i miri i ya walikɛne yagin ma, e nun yamaan naxanye birin goron n xun ma. 
Alatala, i yaxune bata nxu rayagi, e biraxi i ya muxu sugandixin fɔxɔ ra yiren birin. 
Barikan xa bira Alatala xa habadan! Amina! Amina!