Yaburina.
95.
Ɛ fa, en xa fa sɛwa bɛtin ba Alatala xa! En sɔnxɔ sɛwani Ala xa, en kantan fanyena, en nakisimana. 
En fa a yɛtagi, en barikan bira a xa. En yi a tantun sɛwa bɛtine yi. 
Amasɔtɔ Alatala nan Ala gbeen na. A tan nan manga gbeena alane birin xun na. 
A tan nan gbee bɔxɔn bunne nun geyane xuntagine ra. 
A tan nan gbee fɔxɔ igen na, bayo a tan nan a daxi. A tan nan bɔxɔ xɔnna rafalaxi. 
Ɛ fa, en fa en xinbi sin, en yi Ala batu. En xa en xinbi sin Alatala bun naxan en daxi. 
Amasɔtɔ a tan nan en ma Ala ra. En findixi a yamaan nan na alo a xuruse kurun naxan nabama. Xa ɛ Ala fala xuiin mɛ to, 
ɛ nama ɛ bɔɲɛni xɔdɔxɔ alo ɛ benbane Meriba yi, alo e naxanye liga na waxatini Masa yi tonbonni. 
E n matandi nɛn mɛnni, e yi n mato, hali e to bata yi n kɛwanle to. 
N xɔlɔ na waxati muxune ma ɲɛɛ tonge naanin, n yi a fala, n naxa, “Yamani ito bɔɲɛn makuya n na, e mi biraxi n ma kiraan fɔxɔ ra.” 
Nayi, n yi n kɔlɔ n ma xɔlɔni n naxa, “E mi soɛ n ma matabudeni mumɛ!”