Yaburina.
101.
Dawudaa bɛtina. N bɛtini ito bama i ya hinanna nun i ya sariya kɛndɛn nan ma fe ra. Alatala, n tantun bɛtin bama i tan nan xa. 
N katama nɛn n xa lu kira kamalixin xɔn. I fama n fɛma waxatin mundun yi? N sigan ti tinxinni n ma banxini. 
N mi tinɲɛ fe ɲaxin ma mumɛ! N dɛnkɛlɛyatarene kɛwanle raɲaxuma nɛn. Nxu mi sese malanɲɛ. 
N mi findɛ tinxintaren na. N mi fe ɲaxi yo rabɛ. 
Naxanye muxune mafalan wundoni, n ne dɛɛn suxuma nɛn. Naxanye muxune matoma a ɲaxin na wasoni, n mi diɲɛ ne ma mumɛ! 
N na n yɛɛn tima nɛn muxu tɔgɔndiyaxine ra yamanani, alogo e xa lu n fɛma. Naxan na sigan ti tinxinni, na luma nɛn n ma wanla ra. 
Yanfanten yo mi luyɛ n konni. Wule fala yo mi luyɛ n yɛtagi. 
Xɔtɔn yo xɔtɔn n muxu ɲaxine bama nɛn yamanani, n fe ɲaxi rabane birin kedima nɛn Alatalaa taani.