Yaburina.
107.
Ɛ Alatala tantun bayo a fan! A hinanna luma nɛn habadan! 
Alatala ɛ tan naxanye birin xunbaxi, ɛ a fala, a ɛ tan naxanye xunbaxi ɛ yaxune yii, 
a faxi ɛ tan naxanye ra sa keli yamana gbɛtɛne yi, sa keli sogeteden nun sogegododen binni, e nun kɔmɛn fɔxɔn nun yiifari fɔxɔn ma. 
Ndee bata yi lɔ ayi tonbon magaxuxini, e mi yi fa kiraan toma siga taani muxune dɔxi dɛnaxan yi. 
Kamɛn nun min xɔnla yi e suxu, e yigitɛgɛ. 
Awa, e yi tɔrɔni waxatin naxan yi, e yi e xui ramini Alatala ma, a yi e xunba e tɔrɔni. 
A yi ti e yɛɛ ra siga kira tinxinxin xɔn ma. A siga e ra taani muxune dɔxi dɛnaxan yi. 
E xa Alatala tantun a hinanna fe ra, e nun a kabanako feen naxanye ligaxi e xa. 
A min xɔnla bama muxune ra, a yi kamɛtɔne ralugo donse faɲine ra. 
Ndee yi dimin nun bɔɲɛ rafɔrɛn nin, e ɲaxankataxin xidixi yɔlɔnxɔnna ra kasoon kui. 
Amasɔtɔ e bata yi murutɛ Alaa falane ma, e mi yi Kore Xɔnna Alaa maxadi xuine suxi. 
Tɔrɔn yi e xadan, e dagalanɲɛ ayi, muxu yo mi e mali. 
Awa, e yi tɔrɔni waxatin naxan yi, e yi e xui ramini Alatala ma, a yi e rakisi tɔrɔn ma. 
A yi e ba dimin nun bɔɲɛ rafɔrɛni. A yi e yɔlɔnxɔnne yibolon. 
E xa Alatala tantun a hinanna fe ra, e nun a kabanako feen naxanye ligaxi e xa. 
A wure dɛɛne gira, a yi wure gbelemɛne kala. 
Xaxilitaren nan yi ndee ra. E yi tɔrɔma e matandine nun e hakɛne nan ma fe ra. 
E na donseen to, e bɔɲɛ masiga ayi. E yi maso sayaan na. 
Awa, e yi tɔrɔni waxatin naxan yi, e yi e xui ramini Alatala ma, a yi e rakisi tɔrɔn ma. 
A yi falan ti, a e rakɛndɛya. A yi e ratanga gaburun ma. 
E xa Alatala tantun a hinanna fe ra, e nun a kabanako feen naxanye ligaxi e xa. 
E xa barika bira saraxane ba Ala xa e yi a wali faɲine fe fala, e sɔnxɔ sɛwani. 
Ndee yi siga fɔxɔ igen xun ma kunkin kui, e yulayaan naba fɔxɔ igen xun ma. 
E yi Alatalaa wanle to, a kabanako feene liga tilinna xun ma. 
A yi foye gbeen yamari, a yi fa fɔlɔ. Fɔxɔ igen yi walanɲɛ ayi. 
Igen mɔrɔnne yi lu kunkini tɛ pon, a mɔn yi lu a ragodɛ tilinna ma. E bata yi kɔntɔfili, e yigitɛgɛ. 
E xun yi magi e ra, e dagalanɲɛ ayi alo muxun na a min. E kɔtɛn birin yi findi fe fuun na. 
Awa, e yi tɔrɔni waxatin naxan yi, e yi e xui ramini Alatala ma. A yi e ba e tɔrɔni. 
A yi a liga foye gbeen yi a raxara. Walanna yi a raxara fɔlɔ. 
Fɔxɔ igen to a raxara, e yi sɛwa. A yi fa e ra e sodeni e yi waxi dɛnaxan xɔn. 
E xa Alatala tantun a hinanna fe ra, e nun a kabanako feen naxanye ligaxi e xa. 
E xa a batu yamaan malanni. E mɔn xa a matɔxɔ fonne malanni. 
A tan nan baane masarama tonbonna ra, a yi tigine findi bɔxɔ xaren na. 
A bɔxɔ faɲin findi bɔxɔ kalaxin na fɔxɔn dɛnaxan yi na kaane ɲaxuyana fe ra. 
A mɔn yi tonbonna maxɛtɛ daraan na, a yi bɔxɔ xaren findi tigi yiren na. 
A yi fa kamɛtɔne ra, e dɔxɔ na, e taan ti e luyɛ dɛnaxan yi. 
E yi xɛɛne bi, e manpa binle si, e yi tɔnɔ gbeen sɔtɔ e yi. 
A yi a yamaan baraka, e yi wuya ayi, a mi tin se yi ba e ɲingene ra. 
A yamaan yatɛn to xurun fɔlɔ e rayarabin nun tɔrɔn nun ɲaxankatan bun, 
a yi na kuntigine raɲaxu naxanye a yamaan lu, e siga wulaan xun xɔn kira mi dɛnaxan yi. 
Koni a yi tɔrɔ muxune ba e tɔrɔni, a yi e denbayane rawuya ayi alo e xuruseene. 
Tinxin muxune yi na to, e sɛwa, koni muxu ɲaxine yi e dundu. 
Naxan na findi xaxilimaan na, a xa a yengi lu feni itoe birin xɔn, a yi Alatalaa hinanna kolon.