Yaburina.
111.
Tantunna Ala xa! N na Alatala tantunma nɛn n bɔɲɛn ma feu, muxu faɲine nun yamaan yɛ. 
Alatala kɛwanle gbo! E rafan naxanye ma, ne maɲɔxɔnma e ma. 
A kɛwanle magaxu, e gbo. A tinxinyaan luma nɛn habadan. 
A bata a kabanako feene rabira en ma. Alatala diɲa, a kininkinin. 
A balon fima nɛn a yɛɛragaxu muxune ma. A mi ɲinanma a layirin xɔn mumɛ! 
A bata a sɛnbɛn yita a muxune ra, a yi xɔɲɛne bɔxɔn so e yii. 
Ɲɔndin nun sariya kɛndɛna a kɛwanle yi. Lannayana a fe ragidixine birin yi. 
E na waxatin birin, lannayaan nun tinxinna nan e ra. 
A bata a muxune xɔrɔya, a yi habadan layirin xidi e xɔn ma. A xinla sariɲan, a magaxu. 
Fe kolonna fɔlɔma Alatala yɛɛragaxun nan ma. Xaxilimaan nan ne ra naxanye na ligama. Tantunna a xa habadan!