Yaburina.
138.
Dawuda gbeena. Ala, n bata i tantun n bɔɲɛni fefe! N bɛtin bama Ala yɛtagi. 
N na n xinbi sinma i ya Banxi Sariɲanxin yɛtagi, n yi i xinla tantun i ya hinanna nun i ya lannayana fe ra. Amasɔtɔ i bata i dɛ xuiin nafisa i xinla yɛtɛɛn xa. 
N ni i xili waxatin naxan yi, i n yabi nɛn, i yi n sɛnbɛ so, i n xaxili ragidi. 
Alatala, dunuɲa mangane birin i tantunma nɛn, e na i ya falane mɛ waxatin naxan yi. 
Alatala, e i kɛwanle matɔxɔma nɛn bɛtini, amasɔtɔ i ya binyen gbo. 
Hali Alatala to mate, a yengi dɔxi muxu diɲaxine xɔn, koni a yɛɛn tixi wasodene ra wulani. 
Xa n sigan tima tɔrɔni, i n nakisima nɛn, i yi n yaxune yɛngɛ i sɛnbɛni, n kisi i sɛnbɛn xɔn. 
Alatala feene raɲanma a faɲin nan ma n xa. Alatala i ya hinanna luma nɛn habadan! I nama i wali xɔnne rabeɲin.