Yaburina.
139.
Dawudaa bɛtina, bɛti baane kuntigin xa. Alatala, i bata n fɛsɛfɛsɛ, i n kolon. 
I n sa waxatin nun n keli waxatin birin kolon. Hali i makuya n na, i n ma miriyane birin kolon. 
I a kolon n nɛma sigatini hanma n nɛma saxi, i n kɛwanle birin kolon. 
Alatala, benun n xa falan ti waxatin naxan yi, n naxan falama i na kolon ki faɲi. 
I n nabilinni, n yɛɛ ra e nun n xanbi ra. N ni i tan nan yii. 
Na fe kolonna magaxu n tan yɛɛ ra yi. A dangu n na, n mi nɔɛ a yigbɛ mumɛ! 
N nɔɛ sigɛ minɛn, n yi n luxun i ya Nii Sariɲanxin ma? N sigan minɛn yi, n keli i tan yɛtagi? 
Xa n te ariyanna yi, i na yi. N na siga laxira yi, i na yi. 
Hali n siga han sogetedeni, hanma n sa dɔxɔ fɔxɔ igen xanbi ra, 
i tima nɛn n yɛɛ ra mɛnna fan yi, i mi n nabeɲinɲɛ mumɛ! 
Xa n na a fala, n naxa, “N xa n luxun dimini. Kɛnɛnna xa findi kɔɛɛn na n nabilinni.” 
Koni sese mi dimin na i tan yɛɛ ra yi, kɔɛni yalan alo yanyina i tan yɛɛ ra yi. Dimin nun yanyin birin lan i tan xa. 
I tan nan n sɔndɔmɛn daxi, i tan nan n saxi nga fatini. 
Ala, n ni i tantunma, amasɔtɔ n da kiin magaxu, i kɛwanle magaxu. N na a kolon n niini ki faɲi. 
N fati bɛndɛn mi yi luxunxi i tan ma, i to yi n nafalama suturani i yi n dama nga kui waxatin naxan yi. 
I yi n toma benun n fatin xa yelin nafalɛ. I bata yi n ma siimayaan xasabin sɛbɛ i ya kitabun kui, benun a xa fɔlɔ waxatin naxan yi. 
Ala, i ya miriyane famu raxɔlɔ n xɔn. E xasabin wuya! 
Xa n na e yatɛ, e wuya mɛɲɛnsinna xa. N na xulun waxatin naxan yi, n mɔn luma i tan nan fɛma. 
Ala, a yi lan nun i xa muxu ɲaxine faxa! Faxa tiine, ɛ masiga n na. 
E fala ɲaxine tima, e i xili kala. I yɛngɛfane i xinla falama fuun nin. 
Alatala, n mi muxune raɲaxuɛ ba naxanye i raɲaxuma? N bata n mɛ na muxune ra naxanye murutɛxi i xili ma. 
E mi rafan n ma mumɛ! N bata e yatɛ yaxune ra. 
Ala, n fɛsɛfɛsɛ i yi n bɔɲɛni feen kolon. N mato, i yi n ma miriyane kolon. 
A mato, xa n kira ɲaxin nan xɔn, i siga n na habadan kira faɲin xɔn ma.