Sandane.
2.
N ma diina, xa i n ma falane suxu, xa i n ma yamarine suxu, 
xa i fe kolonna xaranne ramɛ, i yi kata e famudeni, 
xa i xaxilimayaan fen, i yi i xui ramini a famun feen na, 
xa i a fen alo gbetina, i yi a xɔn fen alo nafulu luxunxina 
nayi, i Alatala yɛɛragaxun famuma nɛn i yi Ala kolonna sɔtɔ. 
Amasɔtɔ Alatala nan fekolonna fima, kolonna nun xaxilimayaan fataxi a falane nan na. 
A muxu faɲine malima, naxanye sigan tima fɛtareyani, a ne yɛ masansanma alo wure lefana e rabilinni. 
Naxanye sigan tima tinxinni, a ne ratangama. A yi a muxu tɔgɔndiyaxine kantan. 
Xa i n xuiin namɛ, i tinxinna nun kiti sa kɛndɛn nun fe faɲin nun kira faɲin birin famuma nɛn. 
Amasɔtɔ fe kolonna luma nɛn i yi, kolonna yi i nii yifan i ma. 
I na feene yɛ fen, na i ratangama nɛn famun yi i kantan. 
E yi i xunba kɛwali ɲaxin kiraan ma, e i ratanga wuledene falane ma 
naxanye kira tinxinxin beɲinma e siga kira yidimixine xɔn 
naxanye sɛwan fe ɲaxin ligadeni, e yi ɲaxan fe ɲaxin na tinxintareyani 
naxanye sigati ki mi tinxin, e kɛwanle kobi. 
I xunbama ɲaxalan yalunxin yii na kii nin. Muxu gbɛtɛna ɲaxanla mi nɔɛ i rakunfɛ fala ɲaxumɛne ra, 
ɲaxanla naxan bata a mɛ a xɛmɛn na a dɔxɔ xɛmɛn naxan xɔn a sungutun waxatini a yi ɲinan na futu layirin xɔn a naxan xidi Ala yɛtagi. 
A kɛwanle findima bɔnɔn nan na a ma, a sigati kiin yi a xali sayani. 
Naxan na siga a konni, na mi fa xɛtɛma a mi fa nii rakisin kiraan masɔtɔma mumɛ! 
I sigama muxu faɲine kiraan xɔn na kii nin, i lu tinxinyaan fari. 
Amasɔtɔ muxu faɲine siimayaan sɔtɔma nɛn yamanani. Fɛ mi muxun naxanye ra, ne luma nɛn yamanani. 
Koni muxu ɲaxine bama nɛn yamanani, yanfantenne yi raxɔri.