Sandane.
9.
Fe kolonna bata sɛnbɛtɛn solofere masoli, a banxin ti alo muxuna. 
A bata suben ɲin, a minseen nafala, a donseene dɔxɔ tabanla ra. 
A bata a walikɛ ɲaxanle rasiga e xa sa a xili xuini ito rawanga taan yire matexini, e naxa, 
“Ɛ tan fe kolontarene, ɛ fa dangu be binni.” Xaxili mi naxanye ma, a falani ito ti ne ma, a naxa, 
“Ɛ fa n ma donseene don, ɛ n ma minseen min n naxan nafalaxi. 
Ɛ xɛtɛ ɛ fe kolontareyaan fɔxɔ ra, ɛ kisima nɛn, nayi ɛ ti xaxilimayaan kiraan xɔn.” 
Naxan na magele tiin maxadi, na konbin nan sɔtɔma. Naxan na muxu ɲaxin sɔnna fala a xa, na tɔrɔma nɛn. 
I nama magele tiin sɔnna fala alogo a nama i raɲaxu, koni i na fe kolonna sɔnna fala a xa, a i xanuma nɛn. 
I na fe kolonna maxadi, na nde sama nɛn a fe kolonna fari. I na tinxin muxun xaran, na a fekolonna nan xun masama. 
Fe kolonna fɔlɔma Alatala yɛɛragaxun nan ma. Muxu sariɲanxine fe kolonna findixi xaxilimayaan nan na. 
N tan fe kolonna, n na i siin sogene rawuyama ayi nɛn, n yi ɲɛɛna ndee sa i ya siimayaan fari. 
Xa i findi fe kolonna ra, i tan nan a saranna sɔtɔma. Xa i findi magele tiin na, i tan nan tɔrɔ sɔtɔma. 
Xaxilitareyaan luxi nɛn alo ɲaxanla naxan sɔnxɔma. Xurutaren na a ra naxan mi sese kolon. 
A dɔxi a banxin dɛ ra, taan yire matexini. 
A lu dangu muxune xilɛ mɛnni naxanye sigama e yɛɛ ra tinxinni. 
A naxa, “Ɛ tan fe kolontarene, ɛ dangu be binni.” Xaxili mi naxanye ma, a ne nan xilima. 
A naxa, “Minseen naxan muɲaxi na nan ɲaxun, donseen naxan donxi luxunni na nan ɲaxun.” 
E mi a kolon a faxa muxune nan mɛnni, a na ɲaxanla a muxu xilixine sigan laxirani.