Marafanna Falane.
8.
Xa ngaxakeden xɛmɛmaan nan yi i ra nun, naxan nga xiɲɛn minxi, n yi sa i ralanma nɛn nun, n yi i sunbu tanden ma, muxu yo mi n naɲaxu. 
N yi i xalima nɛn nun, n sa i raso ngaa banxini. I yi n xaran xanuntenyaan ma. I yi n ma manpa xiri ɲaxumɛn min, n ma girenada bogine igene. 
A kɔmɛn ma yiina n xunna bun, a yi a yiifanna rabilin n ma. 
Yerusalɛn sungutunne, n bata ɛ rakɔlɔ, ɛ nama xanuntenyaan nakeli, ɛ nama a raxulun, benun a waxatin xa a li. 
Ɲaxanla mundun fama ito ra sa keli tonbonni, a singanxi a xanuntenna ra? Ɲaxanla falana a xɛmɛn xa: N bata i raxulun mangon binla bun, i bari ngana i fudi tongoxi dɛnaxan yɛtɛni. 
N ma fe sa i bɔɲɛni alo taxamasenna i yiin na, bayo xanuntenyaan sɛnbɛn gbo alo sayana. Xɔxɔlɔnna ɲaxu alo laxira, a dɛgɛn xɔlɔ alo habadan tɛɛ dɛgɛna. 
Ige gbeene mi nɔɛ xanuntenyaan ɲanɲɛ. Baa igene mi nɔɛ a xalɛ. Xa muxuna nde yi katɛ a banxin kui seene birin masarɛ xanuntenyaan na, muxe mi yi tinɲɛ a rasuxɛ. 
Nxu xunyɛ ɲaxalanmana nde na, naxan xiɲɛye munma te singen. En nanse ligama en xunyɛ ɲaxalanmaan xa, en na a futu feen fala lɔxɔn naxan yi? 
Xa a luxi alo taan nabilinna yinna naxan mi rabima, nxu a binyama nɛn gbeti gbeen na. Koni xa a luxi alo dɛɛn naxan nabima keden na, nxu a balanma suman farinne nan na. 
N tan luxi nɛn alo taan makantan yinna, n xiɲɛne luxi alo sangansona. N luxi nɛn n ma xɛmɛn yɛɛ ra yi alo ɲaxanla naxan fama bɔɲɛ xunbenla ra a xa. 
Manpa bili nakɔna nde yi Sulemani yii Baali-Hamon yi, a yi a taxu muxuna ndee ra. E birin yi fama gbeti gbanan wuli keden nan na a bogine saren na. 
N ma nakɔna n tan nan xa. A n yii. Na gbeti gbanan wuli kedenna i tan nan xa Sulemani, i yi kɛmɛ firin so a kantan muxune yii. 
I tan naxan dɔxi nakɔni, n lanfane tuli matixi i ra. I xuiin namini n xa a mɛ. 
N xanuntenna, i gi, alo bolena hanma xɛli sɛnbɛmaan geyane fari sansi xiri ɲaxumɛne dɛnaxan yi.