Esayi.
3.
Marigina Alatala Sɛnbɛn Birin Kanna balon nun fɛrɛn birin bama nɛn Yerusalɛn kaane nun Yuda kaane birin yii. A donseene nun igene birin ba na 
e nun sofa kɛndɛne nun yɛngɛsone nun kitisane nun nabine nun yiimatone nun fonne birin, 
e nun sofa kuntigine nun muxu gbeene nun kawandi tiine nun yii rafalane, e nun woyimɛ yɛbaxine. 
Ala naxa, “N diidine findima nɛn e mangane ra, naxanye mangayaan nabama e waxɔnna ra.” 
Muxune e bode ɲaxankatama nɛn yamani, birin yi lu a dɔxɔ boden xili ma diidine yi ɲaxu fonne ra fuyantenne yi ɲaxu muxu binyene ra. 
Muxuna nde a ngaxakedenna suxuma nɛn a fafe xabilani, a yi a fala a xa, a naxa, “Dugi faɲin mɔn i yii, findi en ma mangan na, i ti yama kalaxini ito yɛɛ ra!” 
Bodena a yabima nɛn na lɔxɔni, a naxa, “Ɛ mali fɛrɛn mi n xa. Donse mi n konni, marabɛri ba mi na. I nama n findi yamaan mangan na de!” 
Yerusalɛn kalamatɔɔn ni i ra, Yuda yamanan bata bira. Amasɔtɔ e bata murutɛ Alatalaa binyen xili ma, e a matandima e falane nun e kɛwanle yi. 
E yɛtagin kiin gbansanna e xun maxidima. Kɛnɛn ma feen nan fa e yulubine ra alo Sodoma kaane, e mi fa e fe luxunma. Gbalon na kanne xa, amasɔtɔ e halagin nan yitɔnma e yɛtɛ xa na ra! 
Ɛ nɔɛ a falɛ nɛn, ɛ naxa, “Tinxin muxune nan hɛrini. E kɛwanle tɔnɔn sɔtɔma nɛn. 
Koni gbalon muxu ɲaxine xa! Feene birin xɔdɔxɔma ayi nɛn e ma. Amasɔtɔ, e saranma nɛn e kɛwanle ra.” 
Ala yi a fala, a naxa, “Diidine nan n ma yamaan ɲaxankata tiine ra, ɲaxanle nan e xun na. N ma yamana, ɛ yɛɛratine ɛ ralɔma ayi nɛn, e yi ɛ kirani fu ɛ ma.” 
Alatala bata keli, a yitɔnxi kitin xili ma, a bata keli siyane makitideni. 
Alatala a yamaan fonne nun a kuntigine makitima, a naxa, “Ɛ tan nan n ma nakɔɔn kalaxi, n ma yamana. Ɛ yi ɛ banxine rafe yiigelitɔne seene ra. 
Nanfera ɛ n ma yamani lunburunma. Nanfera ɛ yiigelitɔne ɲaxankatama?” Marigina Alatala Sɛnbɛn Birin Kanna falan nan na ra. 
Alatala naxa, “Siyon sungutunne bata e yɛtɛ yite. E sigan tima e kɔɛni texin na e muxune rakunfa e yɛɛne ra. E sigan tima dɔɲin dɔɲinna ra, e lu e san kɔɛ rasone xuiin naminɛ.” 
Marigin Siyon kaa sungutunne findima nɛn teli kanne ra, Alatala yi e xunne magenle lu. 
Na lɔxɔni, Marigina e ratofan seene bama nɛn e yii: San kɔɛ rasone nun ɲɛrɛne nun maxidi seen naxanye digilin fɔlɔxi alo kikena 
e nun tunla soone nun yii kɔɛ rasone nun kɔɛ mafilinne 
e nun labaranne nun ɲɛrɛ yɔlɔnxɔnne nun tagixidi dɛnbɛxine nun latikɔnɔnne nun e kantan seene, 
e nun yii soli rasone nun ɲɔɛ raso wurene, 
nun sali dugi faɲine nun doma gbeene nun gubane nun gbeti sa seene e yii, 
e nun mato kikene nun doma yelefuxin tofaɲine nun kɔɛ raxidine nun tungun mafelenne. 
E latikɔnɔnne xirin masarama nɛn se kunxin xirin na, e tagi xidin yi masara lutin na. E xun dɛnbɛxi faɲine gbananma nɛn, sunu dugine nun bɛnbɛnle yi ragodo e ma dugi faɲine funfuni. Yagin larune yi sa e ma tofanna funfuni. 
Yerusalɛn kaane, ɛ xɛmɛne faxama nɛn silanfanna ra, ɛ sofane yi faxa yɛngɛni. 
Nayi, taan birin e wugama nɛn, e sunu. A muxune halagixin yi lu dɔxi bɔxɔni.