Esayi.
8.
Alatala yi a fala n xa, a naxa, “Walaxa belebelena nde tongo, i yi sɛbɛnla ti a ma naxan nɔɛ xaranɲɛ, i naxa, ‘Nafunle Suxu Keden Na. A Tongo Mafurɛn.’ ” 
N yi walaxan yita sereya tinxinxi firin na: Saraxarali Yuriya nun Sakari, Yeberekiyaa dii xɛmɛna. 
Na xanbi ra, n yi n ma ɲaxanla kolon ɲaxanla ra, nabi ɲaxalanmana. A yi fudikan, a yi dii xɛmɛn bari. Nayi, Alatala yi a fala n xa, a naxa, “A xili sa, ‘Nafunle Suxu Keden Na. E Tongo Mafurɛn.’ 
Amasɔtɔ, benun i ya diin xa fatan a falɛ ‘baba’ hanma ‘n na,’ Asiriya mangana muxune Damasi taan nun Samari taan nafunle tongoma yɛngɛni nɛn.” 
Alatala mɔn yi a fala n xa, a naxa: 
Yamani ito tondixi Silowa baa ige faɲin ma, e tunnaxɔlɔxi e ma Manga Resin yɛtagi e nun Remaliyaa dii xɛmɛna. 
Nayi, Marigina Efirati baa ige walanxi gbeen nadinma nɛn e xili ma alo fufana, Asiriya mangan nun a sɛnbɛ gbeen nan na ra. Efirati baan fema nɛn han a bɔxɔn a ma. 
Fufaan danguma nɛn Yuda yamanan naxɔrɛ, a sa yiren birin xun ma, a te han a kɔɛɛn bun. A fa han a sa ɛ yamanan yiren birin xun ma. Ala en tagi! 
Siyane, ɛ gbelegbele, ɛ gaxu! Ɛ tuli mati, ɛ tan naxanye sa yamana makuyene yi! Ɛ yitɔn yɛngɛn xili ma, ɛ yigitɛgɛma nɛn! 
Ɛ na yɛngɛ feene yitɔn, e kalama nɛn! Ɛ na falan ti, a mi kamalima! Amasɔtɔ Ala nxu tagi. 
Alatala bata a yii sɛnbɛ gbeen sa n ma, a yi n maxadi, a n nama yamani ito raliga. A yi a fala n xa, a naxa: 
Yamani ito feen naxanye yatɛma yanfan na ɛ tan nama ne birin yatɛ yanfan na de! Ɛ nama gaxu e gaxu feene yɛɛ ra ɛ nama xamin ne fe yi de! 
Ɛ xa Alatala Sɛnbɛn Birin Kanna nan tun kolon sariɲanden na, ɛ lan ɛ xa na nan binya, ɛ lan ɛ xa gaxu a tan nan yɛɛ ra. 
Amasɔtɔ Ala findima nɛn yire sariɲanxin na e nun gɛmɛna Isirayila yama firinne xa, yamana e sanna radinma gɛmɛn naxan na, a findi e rabira gɛmɛn na. A findima nɛn luti ratixin na Yerusalɛn kaane yɛɛ ra, a e suxu. 
E wuyaxi e sanna radinma nɛn, e bira, e fe yi kala. E suxuma nɛn lutin na, e mi nɔɛ e fulunɲɛ. 
N yi na sereyaan namara n yi, n yi xaranni ito balan, n na fala n ma xarandiine nan tun xa. 
N na Alatala mamɛma naxan bata a yɛtagin luxun Yaxuba bɔnsɔnna ma. N nan n yigi sama Ala nin. 
Nxu nun n ma diine nan ito ra, Alatala naxanye fixi n ma. Nxu findixi taxamasenne nun marakolon seene nan na Isirayila yi, fata Alatala Sɛnbɛn Birin Kanna ra naxan dɔxɔden Siyon geyaan fari. 
Ndee a falama, e naxa, “Ɛ barin kiine nun yiimatone maxɔdin, naxanye wundo feene kɔyɛkɔyɛnma, e falan ti e dɛ bun ma. A mi daxa yamaan xa e gbee alane maxɔdin ba? Muxune mi barinne xan maxɔdinma ɲɛɲɛ muxune xa ba?” 
Ɛ ne yabima nɛn, ɛ naxa, “Fɔ en xa xɛtɛ Alaa sariyan nun a fala xuine nan ma.” Xa naxan mi falan tima na kiini, na kanna mi kɛnɛnna toma. 
Muxune yigitɛgɛxin nun e kamɛtɔne e masiga tima nɛn yamanan xun xɔn ma. Kamɛn na e suxu ɲaxi ra, e xɔlɔma nɛn, e sa e mangan nun e Ala danga. E yɛɛn tima nɛn koren na, 
na xanbi ra e yi bɔxɔn mato. Koni e tɔrɔn nun dimin nun bɔɲɛ rafɔrɛ gbeen nan tun toma. E yi rawoli dimi gbeeni. 
Anu, naxanye yi luxi na tɔrɔni, ne dimin ɲanma nɛn. Waxati danguxini, Ala yagin nan nagidi Sabulon yamanan nun Nafatali yamanan ma. Koni waxati famatɔni, kiraan naxan sigama baan ma, Yurudɛn baan kidi ma, a na rafema nɛn binyen na e nun siya gbɛtɛne yamanana, Galile.