Esayi.
15.
Waliyiya falana Moyaba yamanan xili ma: Ari taan bata raxɔri Moyaba yamanani a kala kɔɛ kedenna ra. Kiri taan bata raxɔri Moyaba yamanani a kala kɔɛ kedenna ra. 
Dibon kaane tema e suxure kide matexine yi e wugama. Moyaba kaane gbelegbelema Nebo nun Medeba taane yi. Muxune birin bata e xunne nun e dɛ xabene bi sununi. 
Sunu dugine nun bɛnbɛnle ragodoxi e ma kirane xɔn ma. E gbelegbelema e banxine fari e nun e yama malandene yi, e birin wugama han! 
Xɛsibɔn nun Eleyale kaane gbelegbelema mali muxu feen na. E xuiin sa mɛma fɔ Yahasi taani. Nanara, Moyaba sofane gbelegbelema, e bata tunnaxɔlɔ e ma. 
N gbelegbelema Moyaba kaane fe ra. A muxune bata e gi siga han Soyari taani, siga han Egilati-Selisiya taani. E tema wugɛ Luxiti geyaan na. E wuga xuini tema e kalana fe ra Xoronayin kiraan xɔn. 
Nimirimi daraan bata xɔri sɛxɛne bata xara, ɲɔxɔndene bata ɲan. Sese xinde mi fa na. 
Nanara, muxune e se dɔnxɛne tongoma naxanye luxi e yii, e nɔxi naxanye ramarɛ, e yi siga e ra Wudi Tofaɲin Xuden kidi ma. 
Sɔnxɔ xuiin minima Moyaba yamanan birin yi. E wuga xuiin minima sa keli fɔ Egilayimi taani, sa keli fɔ Elimi xɔɲin yireni. 
Xuden naxan danguma Dimɔn yi, na bata findi wunla ra. Ala naxa, “N mɔn gbalo nɛnɛne rasigama nɛn Dimɔn yi. N yatana nde rafama nɛn Moyaba muxu gixine xili ma, e nun naxanye na lu e yamanani.”