Esayi.
51.
Ɛ tuli mati n na, ɛ tan naxanye tinxinyaan fɔxɔ ra, ɛ tan naxanye Alatala fenma! Ɛ yɛɛn ti fanyen na, ɛ minixi naxan yi, e nun gɛmɛna ɛ baxi dɛnaxan yi. 
Ɛ yɛɛn ti Iburahima ra, ɛ fafe, e nun Saran, naxan ɛ barixi. Amasɔtɔ n Iburahima xili waxatin naxan yi, dii mi yi a yii nun. Koni n barakan sa nɛn a fe yi, n yi mayixɛtɛ wuyaxi fi a ma. 
Alatala Siyon taan masabarima na kii nin, a yi kininkinin a yire kalaxine birin ma. A yi a tonbonna lu alo Eden nakɔna. A bɔxɔ xarene yi lu alo Alatalaa nakɔna. Sɛwan nun ɲaxanna luma nɛn a yi, bɛti xuine nun sigi xuine yi mɛ a yi. 
Ala naxa, “Ɛ tan n ma yamana, ɛ tuli mati n na! Ɛ tan n ma yamanan muxune, ɛ n xuiin namɛ, bayo n sariyan fima nɛn, n ma kiti kɛndɛn yi findi kɛnɛnna ra siyane xa. 
N ma tinxinyaan somatɔɔn ni i ra, n ma marakisin yi makɛnɛn. N kiti kɛndɛn nafama nɛn siyane ma n sɛnbɛn xɔn. Fɔxɔ ige tagi bɔxɔne yi e yigi sa n yi, e yi e xaxili ti n sɛnbɛn na. 
Ɛ yɛɛ rate kore, ɛ mɔn xa bɔxɔn mato. Kore xɔnna lɔma ayi nɛn alo tutina, bɔxɔ xɔnna yi ɲan alo dugina, a muxune yi faxa alo tugetugene. Koni n ma marakisin luma nɛn habadan, n ma tinxinyaan mi ɲanɲɛ mumɛ! 
Ɛ tuli mati n na, ɛ tan naxanye tinxinna kolon. Ɛ tan yamaan naxan n ma sariyan namaraxi ɛ bɔɲɛni! Ɛ nama gaxu muxune mafala xuine yɛɛ ra, ɛ nama gaxu e konbine yɛɛ ra. 
Bayo, e fatin kalama nɛn, kunle yi e don, alo domaan xiine bun, koni n ma tinxinna luma nɛn habadan, n ma marakisin yi lu mayixɛtɛ nun mayixɛtɛne xa.” 
Keli Ala, keli! I sɛnbɛ so! Alatala, i fangan nakeli alo lɔxɔ singene, alo waxati danguxine yi! I tan xa mi Misiran yamanan kala ba, i yi na ige yi ninginangani sɔxɔn? 
I tan xa mi baa gbeen igen xara ba, tilin gbeen yi xɔri. I tan xa mi kiraan sa baan xɔnna ma alogo i ya muxu xunbaxine xa gidi? 
Alatala na naxanye xɔrɔya, ne xɛtɛma nɛn. E fama nɛn gbelegbelɛ ɲaxaɲaxani Siyon taani, habadan sɛwan yi e yɛtagini yalan. Ɲaxaɲaxan nun sɛwan luma nɛn e yi, sunun nun kutunna yi ɲan fefe! 
N tan keden peen nan ɛ ralimaniyama. Nanfera ɛ gaxuma muxune yɛɛ ra, naxanye faxama? Adamadiine raɲanna luma nɛn alo sɛxɛna. 
I bata ɲinan Alatala xɔn naxan i daxi, naxan kore xɔnni fulunxi, a bɔxɔ xɔnna bɛtɛn sa! I luma nɛn gaxuni waxatin birin i ɲaxankata tiin bun ma alo a na a yitɔn i halagi xinla ma! Koni ɲaxankata tiina fitinan minɛn? 
A gbee mi fa luxi kasorasane xa beɲin. E mi faxama kasoon na, donseen mi fa dasama e ma sɔnɔn. 
Alatala nan n tan na, i ya Ala, naxan fɔxɔ igeni maxama, a mɔrɔnne yi xuxu. A xili nɛn Alatala Sɛnbɛn Birin Kanna. 
N bata n ma falan naso i dɛ n yi n yiin nininna ti i xun ma. N tan naxan kore xɔnna sa a funfuni, n yi bɔxɔ xɔnna bɛtɛn sa, n yi a fala Siyon kaane xa, n naxa, “N ma yamaan nan ɛ tan na.” 
Ɛ xulun, ɛ xulun! Yerusalɛn kaane ɛ keli! Ɛ tan naxanye ɛ minxi Alatalaa xɔlɔn dɔlɔ lengenna ra ɛ tan naxanye a xɔlɔ igelengenna rafexin minxi han ɛ yi a ɲan, a yi ɛ xunna firifiri! 
Ɛ diin naxanye birin barixi, keden mi na naxan tiyɛ ɛ yɛɛ ra. Ɛ diin naxanye birin maxuruxi keden mi na naxan ɛ yii rasuxɛ. 
Tɔrɔn bata ɛ sɔtɔ firin firin yɛɛn ma: gbalon nun halagina fitina kamɛn nun yɛngɛna. Anu, nde i ralimaniyɛ, nde i masabarɛ? 
Ɛ banxulanne bata bira bɔxɔn ma kira xunne birin na, e fugaxi a ra alo bolen na a suxu lutin na, e saxi Alatalaa xɔlɔn bun, ɛ Ala bata a kɔnkɔ e ma. 
Nanara, i tuli mati n na, taa tɔrɔxina, i tan naxan xunna firifirixi, koni i mi dɔlɔ minxi! 
Marigina Alatala ito nan falaxi, i ya Ala, naxan a yamaan xun mayɛngɛma, a naxa, “N ni igelengenna bama nɛn i yii naxan i xun magima a ra, n ma xɔlɔ igelengenna. I mi fa a minma sɔnɔn. 
N na a soma nɛn muxune yii naxanye yi i tɔrɔma, naxanye yi a falama i ma, e naxa, ‘I felen nxu xa dangu!’ I yi i fanna ti e xa alo bɔxɔna alo kirana dangu muxune xa.”