Yeremi.
10.
Isirayila yamana, ɛ tuli mati Alatalaa falan na lan ɛ ma! 
Alatala ito nan falaxi, a naxa, “Ɛ nama bira siya gbɛtɛne kirane fɔxɔ ra. Ɛ nama gaxu taxamasenne yɛɛ ra naxanye toma kore, alo siya gbɛtɛne. 
Bayo yamanane namunne findixi fe fuune nan na. E wudin sɛgɛma fɔtɔnni, yii rawali kɛɛn yi a masoli soden na. 
E yi a rayabu wure gbeti fixɛn nun xɛmaan na, e yi a gbangban alogo a nama bira. 
Na suxurene luxi nɛn alo xɔli magaxu seen naxan tixi xɛɛn ma, e mi fala tima, fɔ e maxali, bayo e mi nɔɛ sigan tiyɛ hali ndedi. Ɛ nama gaxu e yɛɛ ra, bayo e mi nɔɛ sese ɲaxi rabɛ, e mɔn mi nɔɛ a faɲin fan nabɛ.” 
Alatala, i tan ɲɔxɔn mi na! I gbo, i xinla sɛnbɛn gbo. 
Nde mi gaxuɛ i tan yɛɛ ra, i tan siyane mangana? E lan e gaxu i yɛɛ ra bayo i ɲɔxɔn mi na siyane fekolonne yɛ, hanma e yamanane birin yi. 
E birin xaxilitare, e birin fekolontare. E xaranxi fe fuun nan ma, wudi batuna. 
E fama na wure gbetine ra sa keli Tarasisi yamanani, e nun xɛmane sa keli Yufasi yi, xabun nun xɛma rawanla yi e rafala suxuren na, e yi a maxidi dugi mamiloxine nun a gbeele yi. Muxu kesuxine wali xɔnna nan tun ne ra. 
Koni Alatala nan Ala ɲɔndin kanna ra. A tan nan habadan Ala ra, habadan mangana. Bɔxɔ xɔnna xuruxurunma a tan nan ma xɔlɔ bun, yamanane mi susɛ naxan ma xɔlɔ yɛɛ ra. 
Yeremi, a fala e xa, i naxa, “Wule alani itoe, e tan naxanye mi kore xɔnna nun bɔxɔ xɔnna daxi ne tununma nɛn bɔxɔ xɔnna fari, e nun kore xɔnna bun.” 
Ala nan bɔxɔ xɔnna daxi a sɛnbɛni, a yi dunuɲa bɛtɛn sa a fe kolonna xɔn, a kore walaxani bandun a xaxilimayani. 
A na a xui ramini, tulen yi a malan kore, a kundaan nafa, sa keli bɔxɔn danne ra. A yi galanna nun tulen nafa, a foyen namini a ramaradeni. 
Muxune birin bata findi xaxilitarene nun fekolontarene ra. Xɛma rawanle birin yagixi lan e sawura rafalaxine fe ma, bayo wulen nan e suxurene ra, nii yo mi e yi. 
Fe fuun nan e ra, wali magelexina. E halagi waxatin na a li, e raxɔrima nɛn. 
Koni Yaxuba gbee Ala mi luxi alo e tan. Bayo a tan nan seen birin daxi. A tan nan gbee Isirayila bɔnsɔnne ra. A xili nɛn Alatala Sɛnbɛn Birin Kanna. 
Ɛ yiiseene malan bɔxɔn ma, ɛ tan naxanye rabilinxi yɛngɛni! 
Amasɔtɔ Alatala ito nan falaxi, a naxa, “N yamanan muxune wolima ayi nɛn alo lantan gɛmɛna. N yi e yigbɛtɛn alogo e xa suxu yɛngɛni.” 
Yamaan naxa, “Gbalona nxu xa! Nxu maxɔlɔxi! Nxɔ furen dɛɛn mi yiyalanɲɛ! Nxu tan nan yi a falama, nxu naxa, ‘Nxɔ furen na a ra, nxu a raxanɲɛ!’ 
N ma bubun bata kala, a lutine birin bata a beɲin! N ma diine bata keli n fɛma, e mi fa na. Muxu yo mi fa n yii naxan mɔn n ma bubun tiyɛ, hanma a yigiyaden ti n xa.” 
Bayo yamaan yɛɛratine xaxili mi na. E mi Alatala fenma. Nanara, e mi sabatixi. E yamaan birin bata raxuya ayi. 
Ɛ tuli mati xui magaxuxini ito ra, a fama muxune yimaxɛ sa keli sogeteden kɔmɛnna binni. A Yuda taane findima nɛn yire rabeɲinxine ra a e findi kankone kurudene ra. 
Alatala, n bata a kolon fa fala adamadiin gbee mi a dunuɲa yi gidin na. Muxun mi a sanna tidene ragidima. 
Alatala, n xuru alo a lan kii naxan yi koni hali i mi n suxu i ya xɔlɔni alogo i nama n halagi. 
I ya xɔlɔn nagodo siya gbɛtɛne ma naxanye mi i kolon, e nun yamanan naxanye mi i xinla binyama! Bayo e i ya yamaan halagima, Yaxuba bɔnsɔnna, e a raxɔrima han, e a bɔxɔne kalama.