Sakari.
12.
Waliyiya falan ni i ra, Alatala falan naxan tixi Isirayila fe yi. A tan naxan kore xɔnna nun bɔxɔ xɔnna daxi, a yi muxun niin sa a yi, Alatalaa falan ni ito ra: 
N Yerusalɛn findima nɛn dɔlɔ min seen na, naxan a rabilinna siyane birin fugama a ra. Yerusalɛn taan nabilinma nɛn yɛngɛni, e nun Yuda yamanan birin. 
Na lɔxɔni, n Yerusalɛn findima nɛn gɛmɛ binyen na siyane birin xa. Naxan yo na kata a yite feen na, na maxɔlɔma nɛn. Bɔxɔn siyane birin e malanma nɛn a xili ma. 
Alatalaa falan ni ito ra: Na lɔxɔni n faan nasoma nɛn e soone birin yi, n yi gaxun naso e soo ragine yi. Koni n nan n yɛɛn tima nɛn Yuda bɔnsɔnna muxune ra. N yi siyane soone birin yɛɛne xɔri. 
Yuda mangane a falama nɛn e bɔɲɛni, “Yerusalɛn muxune bata en sɛnbɛ so Alatala Sɛnbɛn Birin Kanna barakani, e Ala.” 
Na lɔxɔni, n Yuda mangane luma nɛn alo tɛɛ wolonne yegene dɛ, alo xaye radɛgɛxin malo xidine tagi. E fama e rabilinna siyane halagideni e kɔmɛnna nun e yiifanna ma. Koni Yerusalɛn kaane mɔn luma nɛn e konni. 
Alatala Yuda dɔxɔdene nan singe rakisima, alogo Dawuda yixɛtɛne nun Yerusalɛn muxune binyen nama dangu Yuda muxune ra. 
Na lɔxɔni, Alatala Yerusalɛn kaane ratangama nɛn. Hali naxan bata tagan e yɛ, a yɛngɛn soma nɛn na lɔxɔni alo Dawuda. Dawuda yixɛtɛne fan luma nɛn alo Ala yɛtɛna, alo Alatalaa malekana e yɛɛ ra. 
Na lɔxɔni, n siyane birin naxɔrima nɛn naxanye fama Yerusalɛn xili ma. 
Nayi, n hinanna nun maxandin niin nagodoma nɛn Dawuda yixɛtɛne ma e nun Yerusalɛn muxune. E yi e yɛɛ rafindi n ma, e naxan yisɔxɔnxi. E sunuma nɛn a fe ra alo dii keden peena. E a wugama nɛn sɔxɔlɛni, alo dii singena. 
Na lɔxɔni, sunun gboma ayi nɛn Yerusalɛn taani, alo Xadada-Rimɔn ma sununa Megido mɛrɛmɛrɛni. 
Yamanan sunuma nɛn, xabilane birin yi lu e danna. Dawuda bɔnsɔnna a danna, e ɲaxanle fan e danna, Natan bɔnsɔnna a danna, e ɲaxanle fan e danna, 
Lewi bɔnsɔnna a danna, e ɲaxanle fan e danna, Simayi bɔnsɔnna a danna, e ɲaxanle fan e danna, 
e nun bɔnsɔnna bonne birin. Birin luma nɛn a danna, e ɲaxanle fan yi lu e danna.