Luka Yesu a Fe Xibaru Faɲin Naxan Sɛbɛ.
1.
N xɔyin Teyofili, Muxu wuyaxi bata sɛbɛnla ti lan feene ma naxanye liga nxu yɛɛ xɔri. 
E feene yɛbaxi nɛn alo sereya kɛndɛne a fala e xa kii naxan yi, xabu a fɔlɔni, naxanye Alaa falan nalima. 
Awa, n xɔyin Teyofili, n bata feni itoe xaran, n yi e fɛsɛfɛsɛ ki faɲi xabu a fɔlɔni. N bata n miri a ma, n naxa, “A lan n xa a sɛbɛ ki faɲi, n yi a rasiga i ma.” 
N ni ito ligaxi nɛn alogo i xa na feene birin ɲɔndin kolon i xaranxi naxanye ma. 
Ito birin fɔlɔxi Herode a mangayaan waxatin nin Yudaya yamanani. Saraxaralina nde yi na, a xili Sakari naxan yi kelixi saraxarali Abiya bɔnsɔnni. A ɲaxanla yi xili Elisabɛti. Na fan yi kelixi saraxarali Haruna bɔnsɔnna nin. 
E firinna birin yi tinxin Ala yɛɛ ra yi, e yi Marigina yamarin nun a sariyan birin suxi. 
Dii yo mi yi e yii nun, amasɔtɔ gbantan nan yi Elisabɛti ra, e firinna birin bata yi fori han! 
Lɔxɔna nde, Sakari a saraxarali wanla waxatin yi a li Ala xa, 
e yi a sugandi masɛnsɛnna xɔn alo saraxaraline darixi a ra kii naxan yi, alogo a xa so Marigin Batu Banxini wusulan gandeni. 
Yamaan yi malanxi tandeni Ala maxandideni wusulanna gan waxatini, 
nayi, Marigina malekan yi mini kɛnɛnni a xa, a ti wusulan ganden yiifanna ma. 
Sakari malekan to waxatin naxan yi, a kuisan, a gaxu. 
Koni malekan yi a fala a xa, a naxa, “Sakari, i nama gaxu! Ala bata i xuiin mɛ, i ya ɲaxanla, Elisabɛti dii xɛmɛn sɔtɔma nɛn i xa, i yi a xili sa Yoni. 
I sɛwama nɛn, muxu wuyaxi fan yi sɛwa a bari feen na. 
Amasɔtɔ a findima nɛn muxu gbeen na Marigin yɛtagi. A nama manpaan min, a nama dɔlɔ ma se yo min. A lugoma nɛn Alaa Nii Sariɲanxin na xabu a nga kui waxatin naxan yi. 
A fama nɛn Isirayila kaan wuyaxi ra e Marigina Ala ma. 
A sigama Marigina xɛrayaan na nɛn sɛnbɛni alo Nabi Eli a liga kii naxan yi. A yi dii fafane bɔɲɛn nafindi e diine ma. A yi muxu murutɛxine masara, e miriyaan yi liga alo tinxin muxune, alogo a xa yamani tɔn Ala xa ki faɲi.” 
Sakari yi a fala malekan xa, a naxa, “N na a kolonma di, fa fala ɲɔndi nan ito ra? N tan bata fori, n ma ɲaxanla fan bata fori.” 
Malekan yi a yabi, a naxa, “Baraka Yibirila nan n tan na, naxan tima Ala yɛtagi. A tan nan n xɛxi i ma feni ito Xibaru Faɲin nalideni i ma. 
Koni bayo i mi laxi n ma falan na, naxan sa kamalima a waxatini, i findima nɛn bobon na, i mi falan tima han na yi liga.” 
Na waxatini, yamaan yi Sakari mamɛma. E yi kɔntɔfili bayo a bata yi bu Ala Batu Banxini. 
Koni a to mini, a mi nɔ falan tiyɛ e xa, e yi a kolon fa fala a bata fe toon ti Ala Batu Banxini. A yi a yiin maliga e xa bayo a mi yi nɔɛ falan tiyɛ. 
A wali lɔxɔne ɲanxina Ala xa, Sakari yi xɛtɛ a konni. 
Na dangu xanbini, a ɲaxanla Elisabɛti yi fudikan. Kike suulun, a mi mini tandeni. 
A yi a fala, a naxa, “Marigina ito nan ligaxi n xa, a bata tin a xa n ma yagin ba n ma n ma muxune tagi.” 
Elisabɛti kuiin kike senninna, Ala yi maleka Yibirila rasiga Galile taana nde yi naxan xili “Nasarɛti.” 
A falan ti sungutun nasɔlɔnxin xa, xɛmɛna nde bata yi a masuxu naxan yi xili Yusufu, Manga Dawuda bɔnsɔnna muxuna nde nan yi na ra. Na sungutun nasɔlɔnxin yi xili nɛn Mariyama. 
Malekan yi fa a fɛma, a naxa, “Sɛwani i xa Ala fe faɲin nagidixi i tan naxan ma. Marigina i xɔn!” 
Mariyama yi kuisan malekana falana fe ra, a yi a miri a xɔntɔnna bunna ma. 
Malekan yi a fala a xa, a naxa, “Mariyama, i nama gaxu amasɔtɔ Ala bata maragidi faɲin fi i ma. 
I fudikanma nɛn, i dii xɛmɛn sɔtɔ, i yi a xili sa Yesu. 
A binyen sɔtɔma nɛn, a xili bama nɛn a Kore Xɔnna Alaa Dii Xɛmɛna. Marigina Ala a findima nɛn mangan na alo a benba Dawuda yi kii naxan yi. 
A findima nɛn Yaxuba bɔnsɔnna mangan na habadan. A mangayaan mi ɲanɲɛ mumɛ!” 
Mariyama yi a fala malekan xa, a naxa, “Sungutun nasɔlɔnxin nan n tan na, ito ligama di nayi?” 
Malekan yi a yabi, a naxa, “Alaa Nii Sariɲanxin godoma nɛn i ma, Kore Xɔnna Ala sɛnbɛn godoma nɛn i xun ma. Nanara, na dii sariɲanxin xili bama nɛn a Alaa Dii Xɛmɛna. 
I ngaxakedenna Elisabɛti fan fudikanna nan a ra iki. Hali a to bata fori, e yi a falama naxan ma a gbantana, na kuiin kike senninden na ra iki. 
Amasɔtɔ Ala nɔɛ feen birin ligɛ nɛn.” 
Mariyama naxa, “Marigina walikɛɛn nan n tan na, Ala xa na liga n xa alo i bata a fala kii naxan yi.” Malekan yi keli a fɛma. 
Na xanbi ra, Mariyama yi a yitɔn mafurɛn, a siga taana nde yi Yuda yamanani, geya wuyaxi yi dɛnaxan yi. 
A siga Sakari konni Elisabɛti xɔntɔndeni. 
Elisabɛti Mariyama xɔntɔn ti xuiin mɛ waxatin naxan yi, diin yi a ramaxa Elisabɛti kui. Elisabɛti yi lugo Alaa Nii Sariɲanxin na. 
A yi a fala ti xuini te, a naxa, “Baraka diin nan i tan na ɲaxanle tagi! I diin naxan fan sɔtɔma, baraka diin nan na ra! 
N binyen sifani ito sɔtɔxi di, n kanna nga xa fa n konni? 
Amasɔtɔ, n na i xɔntɔn ti xuiin mɛ waxatin naxan yi, diin yi a ramaxa n kui sɛwani. 
Sɛwani i xa, i tan naxan laxi a ra fa fala Marigina falan kamalima nɛn.” 
Mariyama naxa, “N Marigin tantunma n bɔɲɛni. 
N sɛwaxi n bɔɲɛni n nakisimana Alaa fe ra. 
Amasɔtɔ a bata a xaxili lu n tan a walikɛ magodoxin xɔn ma. Nanara, fɔlɔ iki ma han habadan, muxun birin a falama nɛn a baraka diin nan n tan na. 
Amasɔtɔ Ala Sɛnbɛmaan bata fe gbeen liga n xa. A xinla sariɲan. 
A kininkinin a yɛɛragaxu muxune ma han mayixɛtɛ mayixɛtɛne. 
Ala bata a yiini bandun, a yi waso muxune raxuya ayi e nun e fe yitɔnxine. 
Ala bata manga sɛnbɛ kanne ba e manga gbɛdɛne yi. Naxanye e yɛtɛ magodoxi, a yi ne yite. 
A kamɛtɔne ralugo fe faɲin na. A nafulu kanne yii seene ɲan. 
Ala layirin naxan xidi en benbane xa, a mi ɲinanxi na ma. 
A yi a xaxili lu a hinanna xɔn ma Iburahima xa e nun a bɔnsɔnna birin han habadan!” 
Mariyama yi kike saxan ti Elisabɛti fɛma. Na xanbi ra, a yi xɛtɛ a konni. 
Elisabɛti dii bari waxatin yi a li, a yi dii xɛmɛn sɔtɔ. 
A dɔxɔ bodene nun a xabilan muxune yi a mɛ a Marigin bata kininkinin a ma, e yi sɛwa e bode xɔn ma. 
Diin barin lɔxɔ xunna, e fa a ra a banxulandeni, e yi a xili sama nɛn Sakari alo a fafe xinla kii naxan yi. 
Koni a nga naxa, “Ɛn-ɛn de! A xili sama nɛn Yoni.” 
E yi a fala a xa, e naxa, “Muxu yo mi i bɔnsɔnni naxan xili na kiini.” 
Nayi, e yi e yiin maliga a fafe xa, e yi a maxɔdin diin xinla ma. 
Sakari yi walaxan tongo, a yi a sɛbɛ, a naxa, “A xili nɛn Yoni.” E birin yi kabɛ kati! 
Na waxatin yɛtɛni, Sakari yi nɔ falan tiyɛ, a Ala tantun fɔlɔ. 
A dɔxɔ bodene yi gaxu kati! Muxune yi na feene falama Yudaya yamanan birin yi. 
Naxan birin a mɛ, ne yi e miri, e maxɔdinna ti, e naxa, “Diini ito sa ligama di?” Amasɔtɔ e bata yi a yigbɛ kati, a Marigin sɛnbɛna a xun ma. 
Yoni Fafe Sakari yi lugo Alaa Nii Sariɲanxin na, a yi waliyiya falane ti, a naxa, 
En Marigin tantun, Isirayilaa Ala! Amasɔtɔ a bata fa, a yi a yamaan mali, a yi e xɔrɔya. 
A bata Marakisi Tiin sɛnbɛmaan namini a walikɛɛn Dawuda bɔnsɔnni, 
alo a fala a nabi sariɲanxine xɔn ma kii naxan yi xabu waxati danguxine. 
A layirin xidi a a en xunbama nɛn en yaxune yii, e nun naxanye birin en naɲaxuxi. 
A yi kininkinin en benbane ma, a yi a xaxili lu a layiri sariɲanxin xɔn ma, 
alo a kɔlɔ en benba Iburahima xa kii naxan yi. 
A yi en xunba en yaxune ma. A tin, en yi a batu bɔɲɛ xunbenli. 
A yi en findi a muxu sariɲanxine nun tinxin muxune ra a yɛɛ ra yi en siin birin yi. 
N ma diina, e i xilima nɛn a Kore Xɔnna Alaa nabina. I sigama nɛn Marigin yɛɛ ra. I kirani tɔn a xa. 
I yi kisi feen yita a yamaan na, e yulubine yi xafari 
a kininkinin gbeen barakani. A tan nan a ligama en lu kɛnɛnni alo sogen tematɔna. 
A yi muxune makɛnɛn naxanye dɔxi dimini sayaan yɛɛ ra. A yi bɔɲɛ xunbenla kiraan yita en na. 
Awa, diin yi gboma, a yi sɛnbɛn sɔtɔma e nun xaxinla. A yi lu wulani han a mini waxatin yi a li kɛnɛnni Isirayila muxune xa.