1 Allempoña am̃chaʼtaret̃ta Festo all Cesareopaʼ pomaʼpamtañoñapaʼ oʼ ahuoʼ Jerusaléño. 2 Oʼ c̈hap Jerusaléñopaʼ añña cornaneshaʼ ñeñt̃ nanac am̃chaʼtaret̃neshaʼ ñam̃a epuet ñeñt̃ nanac sherbets judioneshacoppaʼ, oʼ serrpareʼtatapet Festo att̃o otteñeʼcheñet Pablo. 3 Ñetpaʼ atet̃ ochet Festo agotatanepaʼtoʼ Pablo att̃och huapa Jerusaléño, t̃arroʼmar ñetpaʼ ahuañacma aʼpoctatuet oʼch cohuet Pablo t̃oño att̃och muetsapueret all. 4 Festoñapaʼ atet̃ otanet:

—Pablopaʼ alloʼtsena all yottam̃peñet Cesareo. Napaʼ oʼ nesecherra oʼch ahuerren Cesareo. Ñatoʼ eʼñech naʼllponmatena oʼch ahuerren. 5 T̃eʼpaʼ ñeñt̃ nanac am̃chaʼtaret̃tetsa socoppaʼ cot̃aʼnerrnetepaʼ allochñapaʼ otteñeʼcheñetepaʼ Pablo all, ñerraʼm poʼñoc̈ht̃eʼ eñall alloch otteñeʼchet.

6 Festoñapaʼ alla aʼpa Jerusaléño allponmat. Ñatoʼ poʼpsocmatño amapaʼ poʼc̈harramatñopaʼ oʼ ahuerr Cesareo. C̈herr Cesareopaʼ tsapat̃ña eʼñe ahuat̃ecmapaʼ oʼ anorros allecma aʼpoctatenet ñoñets. Allot̃ña agotatan Pablo. 7 Allempoña huapachet Pablopaʼ, añña judioneshaʼ ñeñt̃ huac̈haʼtatsa allpaʼ c̈ha arrotam̃pesyet. Allempoñapaʼ otteñeʼchoset. Shonteʼ esocmañen nanac sosey tomaʼtam̃pesyesoset Pablo, t̃arraña ama errot̃enot̃ eñotacheto am̃chaʼtaret̃ Festo att̃och otoset eʼñe poʼñoc̈h. 8 Pabloñapaʼ oʼ eños ñam̃a ñocop atet̃ ot:

—Napaʼ ama c̈ho nachm̃areʼteno ñoñets ñeñt̃ atet̃ anaret̃ judioneshacop. Ñam̃a napaʼ ama c̈ho naʼsosyateññañe Parets paʼpaquëll. Ñam̃a napaʼ ama c̈ho nat̃pareʼteno ñoñets ñeñt̃ nen am̃chaʼtaret̃ Romot̃.

9 T̃arraña Festopaʼ nanac mueneñ oʼch coshatan judioneshaʼ, ñeñt̃oʼmarña otan Pablo:

—¿Pocteʼt penteñ oʼch ahuep̃ Jerusaléño allñapaʼ allchaʼ nentonap̃ att̃o poʼñoc̈ht̃eʼ alloch otteñeʼchapet?

10-11 Pabloñapaʼ alla anapuerrerr, atet̃ ot:

—Napaʼ añña pocteʼ nenten oʼch aʼpoctaton am̃chaʼtaret̃ ñoñets ñeñt̃ romoʼmarneshaʼ, t̃arroʼmar amat̃eʼ errot̃enot̃ neto Jerusaléño, t̃arroʼmar ama errot̃ nepeñeña judioneshaʼ, amaʼt p̃apaʼ peñotueñ. Ñeñt̃oʼmar aña pocteʼ nenten oʼch aʼpoctaton am̃chaʼtaret̃ ñoñets ñeñt̃ romoʼmarneshaʼ. T̃eʼpaʼ arroʼtsenen pesho ñeñt̃ep̃ eñets epap̃ am̃chaʼtaret̃ romoʼmarneshaʼ ñeñt̃ pocteʼ nenten na, ñach aʼpoctateʼña ñoñets nocop. T̃arraña ñerraʼm poʼñoc̈ht̃eʼ añ oʼ nep̃ohua ñeñt̃ ama pocteyaye amapaʼ atet̃ ñerraʼm alloch muetsanet ñeñt̃paʼ eʼñe pocteʼ muetsanetepaʼ. T̃arroʼmar ama nemno oʼch naʼqueshp̃ata nañeña. T̃arraña ñerraʼm eʼñe att̃ot̃apaʼ ama pocteyaye oʼch pepomuen judioneshesho. Ñeñt̃oʼmar napaʼ nemneñ oʼch aʼpoctaton am̃chaʼtaret̃ ñoñets ñeñt̃ romoʼmarneshaʼ eʼñe ñapuet̃.

12 Allempoña Festopaʼ oʼ serrpareʼtet epuet ñeñt̃ parro cot̃apeʼchatannenet. Allempoñapaʼ atet̃ otan Pablo:

—T̃eʼpaʼ nanac am̃chaʼtaret̃esho pesechenapaʼ amaʼtpaʼ allchaʼcaʼye peta.

13 Oʼ allponmaterrerrpaʼ huapa am̃chaʼtaret̃ Agripa epuet poʼc̈h Berenice. Oʼ c̈hapuet Cesareo all emoʼteñetaʼ am̃chaʼtaret̃ Festo. 14 Oʼ allponmatosetpaʼ allempoña Festopaʼ serrpareʼtatanet att̃o otteñeʼcheñet Pablo, atet̃ otanet: Arrpaʼ alloʼtsen puesheñarr yacma ñeñt̃ naʼnom Félix ahuaña all yottam̃peñet. 15 Allempoña napaʼ Jerusaléñoʼtsenenpaʼ, añña cornaneshaʼ ñeñt̃ paʼm̃chaʼtaret̃erneshaʼ pen allohuen judioneshaʼ poʼcornaneshar, ñam̃a poʼpotantañ ñeñt̃ pomporneshaʼ penet, ñetñapaʼ oʼ serrpareʼtatnet att̃ot̃ otteñeʼcheñet Pablo, ñam̃a otnet napaʼ nemtsachepaʼtoʼ Pablo. 16 Nañapaʼ atet̃ notanet: “Ñeñt̃ ñoñets anaret̃ Romot̃paʼ ama pocteyaye oʼch yemtsach acheñ ñerraʼm ama eñorenaʼ eʼñe ñocop att̃och eñotatanet att̃ot̃ otteñeʼcheñet.” 17 Ñeñt̃oʼmarña allempo huac̈haʼta judioneshaʼ nesho, allempoña na tsapat̃ñapaʼ oʼ nanorros allecma yaʼpoctaten ñoñets. Allempoña napaʼ oʼ nagotach Pablo. 18 Añña ñeñt̃ huac̈haʼtatsapaʼ allent̃a t̃omc̈haʼtoset att̃och oʼch alla otteñeʼchueñeterr Pablo, t̃arraña amaña añeyeʼ aʼmet̃aʼyeseto att̃o ñeñt̃ poctetsa oʼch yemtsach acheñ. 19 Aña aʼmet̃aʼyeset ñeñt̃ eʼñe ñocpueta atet̃ yec̈henet ñet judioneshet. Ñam̃a aña aʼmet̃aʼyeset ñeñt̃ poct̃ap̃ña puesheñarr ñeñt̃ paʼsoʼcheñ Jesús, t̃arraña ñeñt̃paʼ oʼ rroma, t̃arraña Pablopaʼ c̈ha oten ñeñt̃paʼ oʼ tanterra. 20 Ñeñt̃oʼmarña napaʼ ama tama neñoche att̃och naʼpoctat ñoñets ñocpuet. Ñeñt̃oʼmarña atet̃ noch Pablo poʼtomña: “¿Pocteʼt̃eʼ penteñ oʼch ahuep̃ Jerusaléño allchaʼ yaʼpoctatenaʼ ñoñets?” 21 T̃arraña Pablopaʼ ama mueno. Ñapaʼ aña muenaʼ allach arr, allot̃chaʼña esempopaʼ entateñetepaʼtoʼ am̃chaʼtaret̃ Augusto all Romo. Ñeñt̃oʼmarña napaʼ not: “T̃eʼpaʼ allepaʼ arrma, esempochña napaʼ oʼch nemñe am̃chaʼtaret̃esho Romo.”

22 Allempoña am̃chaʼtaret̃ Agripapaʼ atet̃ otan Festo:

—Napaʼ atarr nemneñ oʼch neʼm̃ nam̃a errot̃ent̃eʼ serrpareʼten Pablo.

Allempoña Festopaʼ atet̃ och:

—Tsapat̃chaʼña peʼm̃ñotaʼmueñ.

23 Tsapat̃ñapaʼ huapaʼmuena am̃chaʼtaret̃ Agripa epuet ñam̃a poʼc̈h Berenice. Ñetñapaʼ c̈ha cohuenetyesoset. Allempoñapaʼ beʼt̃osc̈haʼtoset allecma serrpareʼtatannena am̃chaʼtaret̃neshaʼ. Oʼ beʼt̃osc̈haʼtet epuet ñam̃a solltarneshaʼ paʼm̃chaʼtaret̃erneshaʼ ñam̃a poʼpoñec̈hno acheñeneshaʼ ñeñt̃ nanac sherbets all anetso. Allempoña Festopaʼ oʼ agotatenanerr Pablo. 24 Allempoña huapa Pablopaʼ Festoñapaʼ eñoratsapaʼ atet̃ ot:

—Am̃chaʼtaret̃e Agripa, ñam̃a allohuenes ñeñt̃es arroʼtsaʼyenes: T̃eʼpaʼ oʼ sentue añ yacma ñeñt̃ nanac eʼmoñeʼten allohuen judioneshaʼ. Ñetpaʼ oʼ otteñeʼchuet eʼñe nesho allempo Jerusaléñoʼtsenen ñam̃a arrpaʼ oʼ otteñeʼchueñetaʼ allempo nec̈herr ñam̃a arr. Amaʼt arrpaʼ oʼ cheʼc̈hameʼtueñetaʼ, atet̃ otyeset: “C̈hosa muetseʼ, t̃arroʼmar añ acheñerpaʼ ama pocteyaye oʼch alla corra.” 25 T̃arraña allempoña napaʼ naʼp̃t̃oʼtareʼchpaʼ ama nentoñeña ñeñt̃ att̃o pocteʼ oʼch nemtsach. Ñam̃a eʼñe ña muenats oʼch entateñetaʼ am̃chaʼtaret̃ Augusto all Romo ñeñt̃oʼmarña napaʼ pocteʼ nenteñ oʼch nemñe all. 26 T̃arraña napaʼ ama neñoteñe ñeñt̃chaʼ atet̃ nequellcoñ yaʼm̃chaʼtaret̃er ñocop t̃arroʼmar ama eñalle errot̃enot̃chaʼ yotteñeʼcheñ. Ñeñt̃oʼmarña t̃eʼpaʼ oʼ nec̈horeʼtach arr all seshontena t̃eʼ.

Allot̃ña Festopaʼ atet̃ otan am̃chaʼtaret̃ Agripa:

—T̃eʼpaʼ p̃ach ñanom aʼp̃t̃oʼtareʼteʼ att̃och napaʼ oʼch neñoch errot̃enchaʼ nequellcaʼ carta am̃chaʼtaret̃ecop. 27 Napaʼ noct̃apeʼcheñ ama pocteyaye oʼch yemñe acheñ ehuancaret̃ ñerraʼm ama eñalle errot̃enot̃ oʼch yotteñeʼcheñ.