1 Allempopaʼ añ am̃chaʼtaret̃tatseʼt̃ romoʼmarneshaʼ ñeñt̃paʼ añ paʼsoʼcheñ Augusto. Ñañapaʼ nenan poʼñoñ ñeñt̃paʼ atet̃ oten: Allohuen acheñeneshaʼ errap̃aren añe patsropaʼ quellcatyesetepaʼ paʼsoʼcheñ. 2 Ñehua, allempo ñanom quellcatyeset paʼsoʼcheñpaʼ, arrña anets Siriapaʼ añ am̃chaʼtaret̃tetsa ñeñt̃paʼ añ paʼsoʼcheñ Cirenio ñeñt̃ paʼm̃chaʼtaret̃er pen allohuen judioneshaʼ. 3 Ñehua, allohuenet ahuanerret paʼtañneshaʼ paʼnetsro allochñapaʼ allchaʼ quellcatyerretaʼ paʼsoʼcheñ. 4 Ñeñt̃oʼmarña Josépaʼ on Nazaretot̃ allara anets Galileo, oʼch ahuoʼ all paʼnetser peʼt̃ paʼtañneshañ, ñeñt̃ña anetserpaʼ añ paʼsoʼcheñ Beléñ, allara Judeo, t̃arroʼmar Beléño eñalleta ahuat̃ paʼtañ David. T̃arroʼmar Josépaʼ Davidnaʼtarcaʼye. 5 Allempoña Josépaʼ ahuoʼ epuet María oʼch quellcatenetaʼ paʼsoʼcheñ. Maríapaʼ José oʼpatenaya ñoʼch yoreʼ. Allempoña Maríapaʼ ac̈homenepaʼtoʼ. 6 Allempoña alloʼtsaʼyenet Beléño, Maríañapaʼ ahuepaʼt c̈hen allempoch emareʼten. 7 Alla emareʼt, ñeñt̃ña pueʼmaret̃ollpaʼ asheñorrot̃oll ñeñt̃ eʼñe poʼmot̃er p̃aʼ. Epeʼ poʼñoʼmopaʼ alla p̃anat̃olleʼch huacshepahuo allot̃ecma apueñet huaquësh puerrar. Ñehua, t̃arroʼmar alla emareʼtos huacshepahuoñaʼ muetsopahuopaʼ ama eseshaʼ epatso eʼñe poctacma eshepena acheñ ñeñt̃ manrraʼtosets all.

8 Allempo emareʼten María all Beléño ñeñt̃e tsaprocma allampañoʼtsen ñam̃a ñeñt̃ cohuam̃peneʼ poʼcarrneror pastemo. 9 Allñapaʼ machayot̃epaʼtchaʼ orrtanet Yompor poʼm̃llañot̃eñer, c̈ha poptanaʼtosanet. Ñeñt̃paʼ Yompor poʼcohuenña ñeñt̃ c̈ha aʼpuetarsam̃p̃sosahuet. Ñetñapaʼ atarr nanac mechaʼtrraʼtapet. 10 Mellañot̃eññapaʼ otosanet:

—Amach sem̃chaʼtatsetno c̈hoña seʼm̃ñoten na, oʼch neñotatoses ñeñt̃chaʼ atarr socshaterreʼ sa amaʼt ñam̃a allohuen errap̃aren acheñeneshacop. 11 T̃eʼpaʼ socop oʼ eñalleta ñeñt̃chaʼ Saʼqueshp̃atañer seperr ñeñt̃paʼ ñeñt̃chaʼ Cristotats ñeñt̃ Yepartseshar yepen. Ñeñt̃ña cheshat̃ollpaʼ arr eñalleta David paʼnetsro allara Beléño. 12 T̃eʼpaʼ oʼch noterrserr att̃och señoch ñeñt̃ cheshat̃oller. Ñeñt̃chaʼ sentos cheshat̃oll ep̃aret̃ poʼñoʼmo all p̃anat̃olleʼteñet huacshepahuo, ñeñt̃caʼyeña Yompor Puechemer.

13 Allempoñapaʼ machayot̃epaʼtchaʼ orrterrerr poʼpotantañ shonteʼ mellañot̃eñneshaʼ ñeñt̃ oʼ sohuac̈herrerr entot̃. Ñeñt̃ña mellañot̃eñneshaʼpaʼ atarr ayeʼchoc̈htatosñañet Yompor. 14 Atet̃ otoset:

15 Allempoña mellañot̃eñneshaʼpaʼ sohuaneret ñeñt̃ cohuam̃peneʼ poʼcarrneror, ñetñapaʼ oʼ ahuanerret pueʼntaño. Allempoña ñeñt̃ cohueneʼ poʼcarrnerorpaʼ allent̃a otannaʼtyeset:

—Errot̃enuacaʼyeña ñeñt̃ otenyaʼ Yompor. Oʼch ahuey Beléño oʼch yenteñaʼ ñeñt̃ atet̃ otenyetaʼ.

16 Allempoñapaʼ pomaʼyorñecma ahuanmuet, oʼña c̈hapuet Beléñopaʼ all entoset María ñam̃a José ñam̃a cheshat̃oll all p̃anat̃olleʼtena huacshepahuo. 17-18 Allempo entoset ñetñapaʼ serrpareʼtoset ñeñt̃ atet̃ oʼ otuenanetaʼ mellañot̃eñ cheshat̃ollecop. Allohuen ñeñt̃ eʼmueneʼpaʼ nanac cohuanrroretyeset, otannaʼtyeset:

—Taʼm errot̃enot̃t̃eʼñacaʼ oʼ serrpareʼtosña atet̃.

19 Maríañapaʼ eʼñe ñeñt̃a nen pueyoc̈hro eʼñe ñeñt̃a cot̃apeʼchen ñeñt̃ allpon oʼ entua ahuañot̃eñ. 20 Allempoña ñeñt̃ cohueneʼ poʼcarrnerorpaʼ oʼ ahuanerret. Atet̃ otenanetaʼ mellañot̃eñneshaʼpaʼ ñetñapaʼ eʼñe poʼñoc̈h entoset. Allpon ñeñt̃ atet̃ eʼmuet, amaʼt ñam̃a ñeñt̃ atet̃ entet, ñeñt̃oʼmarña ñetpaʼ eʼñe paʼyeʼchoc̈htateñeshet ahuanerret, att̃oña ñetpaʼ atarr cohuentatnerrñañet Yompor.

21 Ñehua, allempoña oʼ posocmataʼmuen, ñeñt̃ asheñorrot̃ollpaʼ oʼ tsorratat̃olleʼchet, ñeñt̃paʼ atet̃ yec̈henaña allohuen judioneshaʼ. Allempo ñeñt̃ña cheshat̃ollpaʼ oʼ sochet JESÚS. Ñehua, ñeñt̃ soʼchñets ñeñt̃paʼ atet̃ otenanaʼ mellañot̃eñ María amaʼt ahuañmoʼchot̃eñ allempo ama ac̈homentenaʼ.

22-24 Allempoña c̈hap allempoch aʼpoctachet ñeñt̃ atet̃ naneʼt̃ Moisés poʼñoñ ñeñt̃chaʼ atet̃ yec̈haʼ judioneshaʼ. Ñehua, ñeñt̃ña ñoñetspaʼ atet̃ oten: “Ñerraʼm esempoch cheyoreʼten coyaneshaʼ, ñerraʼm asheñorr pueʼmaret̃oll ñeñt̃ eʼñe poʼmot̃erpaʼ neñetepaʼ Partsocop.” Ñam̃a poʼpoñ Moisés poʼñoñ ñeñt̃ atet̃ neʼt̃, ñeñt̃paʼ atet̃ oten: “Muetsatenetepaʼ epm̃a arot amapaʼ epm̃a yepec̈hoʼyeʼ ñeñt̃chaʼ net Yomporecop.” Ñeñt̃oʼmarña allempo c̈hap allempoch aʼpoctatet Yomporecop ñeñt̃ atet̃ anaret̃ poʼñoñ, ñeñt̃ña cheshat̃ollpaʼ allent̃a anmet Jerusaléño, allchaʼ aʼpoctachet Yomporecop.

25-27 Allempoña c̈hapuet Jerusaléñopaʼ oʼ beʼt̃ososet Parets paʼpacllo att̃och aʼpoctatenetaʼ ñeñt̃ atet̃ yec̈henet ñeñt̃ atet̃ oten ñoñets ñeñt̃ anaret̃ ahuat̃ot̃eñ. Allñapaʼ huapa puesheñarr yacma añ paʼsoʼcheñ Simeón ñeñt̃paʼ jerusaléñoʼmarneshaʼ. T̃arroʼmarña ñapaʼ allempocma huapañaʼ ñapaʼ añ eñotateʼ Parets Puecamquëñ. T̃arroʼmar ñeñt̃ acheñerpaʼ atarr cohuen ñeñt̃ atarr maʼyoc̈hrenaya ñeñt̃ cohuentetsa Yomporecop. Ñapaʼ ñeñt̃ atarr cohueneʼ esempoch huapa ñeñt̃chaʼ aʼrroyataterreʼ israelenaʼtarneshaʼ allochñapaʼ oʼch alla atarr cosherret. Att̃o c̈hapoña Parets Puecamquëñ ñeñt̃ña eñotateneʼ ñapaʼ amach rromuenaʼpaʼ enterranchaʼ Yompor Puechemer ñeñt̃ Cristo ñeñt̃chaʼ llesenserr esempo. 28 Huaptsapaʼ allent̃a enatat̃olleʼtosan cheshat̃oll, atarr ayeʼchoc̈htatosan Yompor. Ñeñt̃paʼ atet̃ otos: 29-30 T̃eʼña poʼñoc̈h Nompore amaʼtchaʼ nerromapaʼ eʼñech nocsheñeshocmañen nerroma t̃arroʼmar t̃eʼpaʼ poʼñoc̈h oʼ nenterrnap̃ ñeñt̃ oʼ pemñerrnay ñeñt̃chaʼ yaʼqueshp̃aterreʼ eʼñe atet̃ p̃otneʼt̃ ahuañmoʼchot̃eñ na ñeñt̃en atarr pesherbeneʼ.

33 Ñeñt̃ña pamoʼmteʼ pen cheshat̃ollpaʼ ñetñapaʼ att̃a cohuanaʼteñet Simeón atet̃ eñoranaʼtenanet pueʼmaret̃ollet. 34 Oʼ eñoranaʼtuanet pueʼmaret̃olletpaʼ allempoñapaʼ enamatanet ñamet ñocpuet Yompor paʼnateña. Allempoñapaʼ otoñ pachor María, ñeñt̃paʼ atet̃ och:

—Peñochepaʼch añ cheshat̃oll ñeñt̃paʼ ñeñt̃ña onañcheʼt̃ ahuat̃ Yompor. Ñocoppaʼ shonteʼch israelenaʼtarneshaʼ ñeñt̃chaʼ ama ameʼñerrayo ñeñt̃chaʼ chenquërrtsa. T̃arraña eñall ñam̃a shonteʼ poʼpotantañ ñeñt̃chaʼ ameʼñerraya ñeñt̃chaʼ cohuenoʼtsenterrtsa. T̃arroʼmar Pomporpaʼ añecopña mueñer allochñapaʼ ñach eñotaterrahuet ñapaʼ Pomporeshot̃ huapa. T̃arraña shonteʼch acheñ ñeñt̃chaʼ achm̃areʼterreʼ. 35 P̃apaʼ ñeñt̃chaʼña atarr pellcaterreʼña p̃a. Atarrchaʼ atserr peʼmuerr pellquëña eʼñech atet̃ peʼmuerr puellquëña atet̃ ñerraʼmrrat̃eʼ cochllo patenpet peyoc̈hro. Elloña puesheñaʼtetspaʼ eñotaterranetchaʼ errot̃ent̃eʼ ñeñt̃ atet̃ cot̃apeʼchyenet pueyoc̈hreto.

36 Allñapaʼ alloʼtsen ñam̃a puesheñarr coyaneshaʼ ñeñt̃paʼ añ paʼsoʼcheñ Ana ñeñt̃ecma aʼm̃teneʼ Yompor poʼñoñ. Ñapaʼ añoʼ poʼseñ ñeñt̃ sochetsa Fanuel, ñeñt̃paʼ Asernaʼtar.* Ñeñt̃ña Aserpaʼ Jacob puechemer. Ñeñt̃ña Anapaʼ oʼ atarr nanac poʼnmeʼten. Ñehua, allempo shopshenaʼpaʼ someʼta, eʼñe canc̈herr charohua yec̈hañ epuet puerrollarpaʼ oʼ rromapes. 37 Ñeñt̃ña rret̃orrnaneshaʼpaʼ att̃a correna ñapuet̃. Oʼ poscoch c̈harraʼ puechena paʼtats char allponmat correna att̃a. Ñapaʼ eʼñe ellapeneʼt̃ sherbeʼ Yompor amaʼt ñam̃a tsapomeʼtets. All Yompor paʼpacllot̃paʼ amach c̈haʼneno. All atarr maʼyochenana Yompor. Errot̃eno eʼñe puemaʼyocheñot̃ Yomporpaʼ amach rreno amaʼt coñeʼt̃a. 38 Ñapaʼc̈hoʼña allempocma huapa all oʼ c̈hapachet cheshat̃oll Jesús. Ñañapaʼ maʼyochosa, atarr parasyosoʼtenan Yompor cheshat̃ollecop. Ñeñt̃oʼmarña ñapaʼ atarr serrpareʼtatosan acheñeneshaʼ ñeñt̃ cheshat̃ollecop t̃arroʼmar oʼ huapa ñeñt̃ atarr cohuen allohuen acheñeneshaʼ ñeñt̃chaʼ aʼqueshp̃atoseʼ israelneshaʼ ñeñt̃ paʼnetser peneʼ Jerusaléñ.

39 Allempoña oʼ aʼpoctatuet ora allpon ñeñt̃ atet̃ anaret̃ Yompor poʼñoño ñeñt̃chaʼ eʼñe yec̈haʼ judioneshaʼ ñetñapaʼ ahuanerret paʼnyeto Nazareto allara Galileo. 40 Cheshat̃ollñapaʼ alloʼna sen rrorranmats, alloʼna sen huomencatnomuets, nanac eñotnenan ñeñt̃ atarr cohuen enten Pompor Parets, ñeñt̃oʼmarña Yomporpaʼ atarr muereña.

41 Ñehua, ñeñt̃ cheshachor pamoʼmteʼ ñetpaʼ atet̃ yec̈henet pat̃eʼtets char pascuapopaʼ c̈hocmach senet Jerusaléño oʼch coshapretenetaʼ pascua ñeñt̃ atet̃ yec̈hena judioneshaʼ. 42 Allempo c̈hap Jesús poʼcharña c̈harraʼ puechena epa ahuanerreterr Jerusaléño, ñetpaʼ atet̃caʼye yec̈henet. 43 Oʼña huañ pascuapaʼ ñetñapaʼ oʼ ahuanerret. Ñeñt̃ña cheshachor Jesúspaʼ allaʼt aʼpa Jerusaléño. Pomporña ñam̃a pachorpaʼ ama eñoteñeto oʼt̃eʼ alla aʼpa. 44 C̈ha otapuetañ añt̃eʼ cot̃aʼnen poʼpotantañ ñeñt̃ parro onac̈henet. Oʼña chopeʼcherret pamt̃arrpaʼ allempoñapaʼ oʼ yerpueret, eʼnameʼtyeretaʼ pamoʼtsesheshoʼmar. Eʼnameʼtyeretaʼ alloʼtsen ñeñt̃ eʼñe chemeʼtyen pompor ñam̃a pachor. 45 Oʼña eʼnameʼtuet ama es enterrayepaʼ oʼ alla ahuerret Jerusaléño. Allpaʼc̈hoʼ eʼnameʼtuereterr.

46 Pomaʼpamtañoñapaʼ alla enteretaʼ Parets paʼpacllo. All anen eʼñe parro maestroneshaʼ ñeñt̃ atarr eñotyeneʼ Yompor poʼñoñ ñeñt̃ atet̃ anaret̃. Jesúsñapaʼ all eʼm̃ñotyenanet ñeñt̃ atet̃ serrpareʼtyenetpaʼ oʼchc̈hoʼ aʼp̃t̃oʼtyerranet. 47 Ñeñt̃oʼmarña allohuen ñeñt̃ eʼmueneʼpaʼ c̈ha atarr cohuanrrorteñet, otyenet:

—Errot̃enot̃uañacaʼyeña atarr es eñoten ñeñt̃oʼmar atarr cohuen es anapyen.

48 Allempo enter pompor ñam̃a pachorpaʼ att̃a cohuanaʼtoset. Pachorñapaʼ atet̃ otos:

—¿Esoʼmart̃eʼña neʼmare oʼ atarr pellcatya? ¿Amaʼt peñoteñe atarr yellquëñeshaʼ yeʼnamenep̃?

49 Ñañapaʼ otapanet:

—Esoʼmareʼtña seʼnameʼtenen. Amaʼt señotennoña napaʼ ñeñt̃ poctetsa nocop oʼch net̃orreññaña ñeñt̃ poctetsa Nomporecop.

50 Ñetñapaʼ ama es eñotaye ñeñt̃ atet̃ otanet.

51 Allempoñapaʼ oʼ cot̃erran pamoʼmteʼ oʼ c̈hac̈herret Nazareto, ñapaʼ eʼñe cohuen ameʼñenana pompor ñam̃a pachor. Pachorñapaʼ allohuen ñoñetspaʼ eʼñe eñotueñ pueyoc̈hro. 52 Jesúsñapaʼ alloʼna sen rrorranmats atarretnomtsa. Alloʼna nanac eñotañetnena. Pomporña Paretspaʼ atarr cohuen enteñ, ñam̃a acheñeneshaʼpaʼ atarr cohuen enteñet.