1-2 T̃eʼpaʼ oʼch notas ñam̃a poʼpoñ. Ñerraʼm poʼñoc̈h yameʼñeñot̃ Cristo eʼñech yocshatannena allempoña poʼñoc̈h sapaʼ socshaterrenchaʼ nam̃a. Añña ñeñt̃chaʼ nocshateneʼ eʼñe poctacma ñerraʼm eʼñech pat̃rra soct̃apeʼchuen allohuenes. Ñam̃a ñerraʼm poʼñoc̈h eʼñe yemorrentannaʼteñot̃ eʼñech yeyemtannaʼtuenapaʼ ñehua, t̃eʼñapaʼ c̈hocmuepaʼch semorrentannena amaʼt eʼñe sagattsa ñeñt̃es eʼñe parroʼmarneshacmas. Ñam̃a ñerraʼm allohueney poʼñoc̈h chorraʼhuenya ñeñt̃ara Parets Puecamquëñpaʼ ñeñt̃ot̃chaʼña eʼñepaʼch sepat̃rratuen soct̃ap̃ñot̃ allohuenes. Ñam̃a ñerraʼm poʼñoc̈h eʼñe socsheñeshaʼ semuerannenapaʼ ñeñt̃ot̃chaʼña amach poʼpoñ sentannaʼtuatsto. 3-4 Ñam̃a amach aña atarr sellcatsto ñeñt̃ eʼñe socpa. Añchaʼña puesheñaʼttsospaʼ sellcapreta ñeñt̃ llecatyeneʼ samoʼts. Ñam̃a amach sañeña entatstatso atet̃ ñerraʼmrrat̃eʼ ñeñt̃es nanac sherbets. Añchaʼña atet̃ sent samoʼts atet̃ ñerraʼmrrat̃eʼ ñetña nanac sherbetset, p̃añapaʼ amach es asherbenayeʼ penteno.

5 Añña pocteʼ oʼch senta sañeña atet̃ enteʼt̃ Cristo Jesús eʼñe ñañeña allempo huapa añe patsro. 6 Ñehua, ñapaʼ amaʼt nanac Paretspaʼ ama ommoʼchaneʼt̃e poʼpartsoña. 7-8 Ñapaʼ eʼñe pocteʼ encheʼt̃ oʼch atet̃ enteñ acheñeneshaʼ ñerraʼmrrat̃eʼ ñapaʼ ama Partsoyaye, oʼch att̃a orrtena ñerraʼm ama esoyaye atet̃ pena acheñ ñeñt̃ eʼñech pauner ap̃aret̃tena. T̃arraña añecop atet̃ peʼt̃ att̃ot̃chaʼ sherbenan Pompor amaʼt ñam̃a acheñeneshaʼ. Ñam̃a ñapaʼ amaʼt Paretspaʼ oʼ acheñetos arr patsro, eʼñe atet̃ orrtosa ñerraʼm ya ñeñt̃ey arromñat̃ey. Ñañapaʼ alloʼna sen pauner entatatsa att̃ot̃ña eʼñe pueʼm̃ñoteñot̃ Pomporpaʼ eʼñe pocteʼ eñch oʼch rroma corsocho ñeñt̃ nanac apencoc̈hen enteteʼt̃ ñerraʼm eseshaʼ rromats atet̃ corsocho. 9 Ñeñt̃oʼmarña att̃ot̃ña Pomporpaʼ oʼ alla nanac aʼcohuentater ñam̃a oʼ alla aphuer ello paʼsoʼcheñ ñeñt̃ nanac cohuen sherbets. Ñeñt̃ña soʼchñetspaʼ ello metanaʼtuanenan allohuen poʼpoñec̈hno soʼchñetsoc̈hno. 10-11 Ñeñt̃oʼmarña esempohuañenpaʼ allohuenet poʼyorñot̃etpaʼ aʼmet̃aʼhueretchaʼ eʼñe poctacma, Jesucristepaʼtña ñeñt̃ nanac partsotets. Allochñapaʼ att̃o eʼñe pameʼñaʼrrteñot̃et Jesús paʼsoʼchñopaʼ concorpaʼrretueretchaʼ allohuenet ñeñt̃ allpon eñall amaʼt allohuen ñeñt̃ entoʼmarneshaʼ ñam̃a allohuen patsoʼmarneshaʼ ñam̃a allohuen oʼponoʼtseneshac̈hno ñeñt̃ patsoʼtsen. Att̃ochña allempopaʼ ayeʼchoc̈htataret̃terra Yompor ñeñt̃ nanac Parets.

12 T̃eʼpaʼ eʼñe nemorrenteñot̃es masheñnesha ñam̃a noc̈hanesha oʼch notenes, ahuañmoʼchapaʼ c̈hocma seʼm̃ñotneʼt̃ ñeñt̃ atet̃ notaseʼt̃ allempo seshoʼtsenen. T̃eʼpaʼc̈hoʼña att̃ecmach seʼm̃ñoten ñeñt̃chaʼ atet̃ noterrserr amaʼt t̃eʼpaʼ nanac b̃ac̈hayoʼtsenen seshot̃. T̃eʼpaʼ añach notas ñeñt̃chaʼ atet̃ sep̃a. C̈hocmuepaʼch semaʼyoc̈hra att̃och alloʼnach sesen etsotnomueʼ ñeñt̃ cohuen enten Yompor, t̃arroʼmar ñapaʼ ñeñt̃ecopña oʼ aʼqueshp̃aterres. T̃arraña eʼñech sem̃chaʼnaʼteñot̃ seyomcha Yompor t̃arroʼmar yeñoteñ yoroc̈henoʼtsenya ñerraʼm ama Yompor poʼhuamenco yeyemto. 13 T̃arroʼmar Yompora eʼñe yemnateneʼ eʼñe yeyoc̈hro ñeñt̃ cohuen enten ña. Ñam̃a ñapaʼ ñach ahuamencat̃ yepeneʼ att̃och yetsotoñ amaʼt ora erraʼtsenchaʼ coshateneʼ ña.

14 Oʼch noterrserr ellonet̃ t̃eʼpaʼ ñeñt̃ ama att̃eyeʼ es sepeno. Amaʼt eseshacpa amach epuoyeʼ es atet̃ sepeno, señoseñeshot̃paʼ amach es sotnareʼtannaʼtatsto. 15 Allochñapaʼ ñerraʼm ama atet̃ yepenopaʼ eʼñech cohuen entyeney allohuen acheñeneshaʼ, amach eñalle att̃och eseshaʼpaʼ oʼch eñosyenet yocop añoʼ pocteyeʼ es yep̃aʼyeno, t̃arroʼmar eʼñech cohuen es yoct̃apeʼchyen att̃och yorrtaten atet̃ penaña ñeñt̃ poʼñoc̈h oʼ puechemer per Yompor. Amach eñalle ñeñt̃chaʼ aʼsosyateneʼ att̃o yocrrena eʼñe cohuen Yomporecop añe patsro. Eʼñech cohuen yorrtena acheñeneshacop amaʼt ñeñt̃ ama ameʼñetso ñeñt̃ atarr nanac sosey cot̃apeʼchenet. Cohuenchaʼ yorretyena atet̃ ñerraʼmrrat̃eʼ rantoc̈hno ñeñt̃ aʼpuetareneʼ checmeteʼ tsapo. 16 Att̃och saʼpuetarsam̃p̃sanetpaʼ c̈hoch señotaterranet ñoñets ñeñt̃ huetsa Yomporeshot̃ alloch yocrrerra eʼñe cohuen. Allochñapaʼ ñerraʼm esempohuañenchaʼ huerra Cristopaʼ socshaterrenchaʼ, t̃arroʼmar neñoterchaʼ ama eʼñe orrena nanac net̃orrerro socop. 17 Ñam̃a amaʼtchaʼ machayot̃a muetsataterrnet arr att̃o napaʼ oʼ nameʼñatasa, napaʼ atarr nocshena ñam̃a t̃eʼpaʼc̈hoʼña nocshapretensa att̃o sameʼñerra. Añña sameʼñeñapaʼ ñeñt̃chaʼ yehuapateññañ Yompor atet̃ ñerraʼmrrat̃eʼ ñeñt̃ amtsaret̃tetsa ñocop. Ñam̃a nerraspaʼ ñeñt̃chaʼ orrtatsa ñerraʼmrrat̃eʼ ñeñt̃chaʼ ashataret̃tatsa all ñeñt̃chaʼ oʼpatateñet Yompor. 18 Ñeñt̃oʼmarña napaʼ nemneñ sapaʼ amach c̈ha sellcatsto, c̈hochña socshapreterrna ñeñt̃ atet̃ oʼ notuas.

19 T̃eʼpaʼ oʼch notas ñeñt̃ atet̃ noct̃apeʼchen. Añ noct̃apeʼchen oʼt̃eʼ nemñer masheñ Timoteo t̃ayecma oʼch enterrsaʼ, ñerraʼm atet̃chaʼ muenaʼ Yepartseshar Jesús. Allochñapaʼ ñach neñotatuerreʼ errot̃ent̃eʼ sep̃aʼyena, allochñapaʼ att̃och socshaterren ñerraʼm cohuenoʼtsenest̃eʼ. 20-21 Añchaʼ nemñonas masheñ Timoteo t̃arroʼmar ama eñalle amaʼt puesheñarra ñeñt̃ cot̃apeʼcheneʼ cohuen atet̃ ñerraʼm ña ñeñt̃chaʼ eʼñe poʼñoc̈h sellcapretenaya ñeñt̃ echarr sentyen. T̃arroʼmar amaʼt eñalleñ ñeñt̃ parro yet̃orrena, ama allohuenacmayeʼ llecapretenseto ñeñt̃ echarr sentyen. Añach t̃orraʼyenet ñeñt̃ eʼñe ñocpueta. Amachña añeyeʼ llecapreteneto att̃och t̃orrenet ñeñt̃ nanac sherbets Jesucristocop. 22 Ñam̃a sapaʼ eʼñe señotueñ atet̃ masheñ Timoteopaʼ eʼñe cohuen p̃aʼyena allempo parro yeserrpareʼtatyen añ cohuen ñoñets alloch yequeshperra. Eʼñe cohuen t̃orrapretenna atet̃t̃eʼña ñerraʼm yechemerpaʼ eʼñech cohuen yenpueney yetaruas. 23 Ñehua, esempoch eʼñe neñoch ñatoʼ errot̃ent̃eʼ poctetsa nocoppaʼ napaʼ noct̃apeʼcheñ oʼch nemñonas masheñ Timoteo. 24 Na t̃eʼpaʼ aña necuen Yepartseshar Cristo ñerraʼm ñach muenats, napaʼc̈hoʼña nab̃cherrsaʼch amach atarr natomatatatsche.

25 Ñam̃a oʼch notas poʼpoñ, eʼñe pocteʼ nenteñ t̃eʼpaʼ oʼch alla nemñer sesho masheñ Epafrodito ñeñt̃ parro yetaruaseñot̃paʼ nanac yet̃orreʼt̃ Yomporecop. Ñeñt̃ara masheñ Epafroditopaʼ ñeñt̃ semñon ahuaña ñach neyenpaʼyesoseʼ all es nepalltena ñeñt̃chaʼ neyenposeʼ arr. 26 Napaʼ eʼñe pocteʼ nenteñ t̃eʼpaʼ oʼch alla ahuerr sesho, t̃arroʼmar ñapaʼ nanac yerpuensa att̃och oʼch alla entuerres. T̃arroʼmar ñapaʼ añ nanac llecateneʼ att̃o sapaʼ ahuoʼt seʼmareʼch ñapaʼ c̈ha atsnaʼtos arr. 27 Ñehua, poʼñoc̈h ahuañapaʼ c̈ha atsnaʼtos c̈ha mueneʼ rromañ, t̃arraña Yompor eʼñe puemuereñot̃eypaʼ oʼ alla aʼcrrater att̃o ñerraʼm rromañpaʼ ellot̃eʼ naʼna llecatañ arr cárcelo. 28 Ñeñt̃oʼmarña eʼñe poctennana oʼch nemñer eʼñe t̃ayecma sesho allochñapaʼ oʼch socshapuera ñerraʼm esempoch c̈herr eʼñe sesho. Allochñapaʼ amach ñaʼna alloʼna nellcatnenaye. 29 Eʼñech separasyosoʼteñeshaʼ Yepartseshar Cristo oʼch sagapapuer ñam̃a eʼñe socsheñeshocmañen. Ñam̃a oʼch notas, c̈hocmuepaʼch semorrenteña amaʼt erraʼtsena acheñer ñeñt̃ eʼñe atet̃ senten ñerraʼm ña. 30 Att̃o ñapaʼ eʼñe puemneññot̃ oʼch t̃orra Cristocop c̈ha atsnaʼt amaʼt c̈ha mueneʼ rromañ. Atarr yoreretsot̃ correrra arr, t̃arraña ñapaʼ ama ñeñt̃ayaya mechaʼto att̃och ñapaʼ oʼch yenposen, ñeñt̃ sapaʼ amat̃eʼ errot̃ sepe att̃och sehuac̈haʼta b̃ac̈hayot̃ eʼñe puesheñaʼttsos att̃och seyenpuennaʼ arr.