1 -Yee "wɛan -kaa kʋ -kaa 'lɛ zia, -e 'wɩ nɛn waa "paaman min ceje ji bɛ, 'ka -tranla! 'Wɩnun nɛn Bali -sru 'ta wʋdɩ -ji 'wɩ "wɛnwɛnnɛnnun -a bɛ, 'ka 'bɛ 'tʋɩ! 'Wɩnun zɩɛ -nyrɛn 'gʋ, min 'e 'si 'wɩ 'wlidɩ "drɛdɩ man -e 'e 'fli -nɔn Bali lɛ, ɛn min 'e yi -tɛra Bali da, 2 ɛn min -batize drɛdɩ da wɩnun, ɛn min -pɛ pladɩ min da, ɛn -kanɔn wluandɩ da wɩnun, ɛn tʋ -fɔla "da "ji Bali minnun -le tin "baa bɛ -a da 'wɩnun. 'Wɩ pɛɛnɔn zɩɛ, kʋ 'ka "vale 'kʋ 'bɛ "paaman "nyian 'ka 'ji dɩ. 3 'Pian kʋ ya "vale, -te Bali wɩɩ "man "bɛ -kaa -kʋ -kaa 'lɛ zia, -e 'wɩ nɛn waa "paaman min ceje ji bɛ, 'ka -tranla!

4 Minnun nɛn o 'ta 'wʋla Zozi -sru fɔɔnɔn, "bɛ -sru 'vaa -e 'o pei 'fɔ "man "bɛ, 'ka 'ci "nrɔn o da! Minnun zɩɛ Bali o man drɛ 'wein 'yee 'tɛ 'san -a, ɛn e 'yee "yi "nɔn -wlɛ. Bali lei 'saun drɛ -wee vɛ -a. 5 Ɛn "nyian bɛ, zɩ Bali wei cɩ 'kpa bɛ, waa -tɔ. Ɛn 'plɛblɛ nɛn Bali -taa 'yee mingɔnnɛn -blɩlɛ -a bɛ, wɛɛ 'tɔ "nyian. 6 'Wɩ pɛɛnɔn zɩɛ waa -tɔ 'vaa "bɛ -sru ɛn 'o pei 'fɔ Zozi man. Min nɛn e 'wɩ zɩɛ -a drɛ bɛ, -si pee "ka -e 'e 'fli -nɔn Bali lɛ "nyian dɩ. Kɔɔ 'wɩ zɩɛ -a drɛdɩ bɛ, yaa -kɔɔnman 'nan, ya'a Bali -pɩ 'silɛa min -a dɩ, ɛn yaa pɛin "nyian yiba "plan da, te minnun -a "srɔnman.

7 -Kaa -kɔɔn fei nɛn min -a "paa bɛ, -a man. Laa -fɛan "man, -e fɛ 'wlɛ nɛn waa -fɔ fei zɩɛ -a da bɛ, e 'bɔla "kaga min nɛn -yee fei cɩ -a bɛ -yrɛ. Tɔɔn te Bali -le -fɛa a 'trɛ zɩɛ -a man. 8 'Pian -te fei zɩɛ lu -wlidɩ 'bɛ bɔa "da "bɛ, min nɛn -yee fei cɩ -a bɛ ya'a "nɛn 'ble dɩ. -Yee "wɛan maan ve 'cɛɛ 'nan, min nɛn e ya "le fei zɩɛ -yee 'wɩ 'zʋ bɛ, tʋ 'ka "nyian -fʋlɛ "kaga "dɩ, -e Bali 'e tin -tɛ "da -e 'e -nan -nyan 'tɛ 'a.

9 'An beenun, kʋ 'wɩ 'pla 'cɛɛ 'wɩnun zɩɛ -a vɩdɩ -a, 'bɛ a zɩ. 'Pian kʋ yi -tɛala "da 'nan 'cee vɛ bɛ, ka ya -si tɩglɩ nɛn min 'sia 'wɩ 'ji "da "bɛ -a da. 10 Kɔɔ Bali a tɩglɩ, ɛn 'cee 'nyranman nɛn 'ka "paa bɛ -a -cin 'ka 'saan "ji "dɩ. Ɛn "nyian 'cee 'pa nɛn kaa wo Zozinɔn 'va 'cee Bali yɩdɩ "yi "le "wɛan bɛ, -a -cin 'ka 'saan Bali ji dɩ. 11 Kʋ ya "vale 'nan 'ka 'fʋ 'wɩ zɩɛ -a drɛnan -trilii, -e 'wɩ nɛn 'ka yiɛ yra -yrɛ "bɛ 'e drɛ 'cee vɛ -a "fo. 12 Kʋ 'ka "va 'nan 'ka 'pɛ 'e plʋ Bali -sru 'ta wʋdɩ man dɩ. Minnun nɛn o yi -tɛra Bali da, ɛn o -pɔan 'sɔ bɛ, 'o drɛ 'cee 'wɩ -kɔɔn "mannɔn 'a! Kɔɔ minnun 'bɔ zɩɛ, fɛ nɛn Bali -tɔ "da 'nan 'e -nɔan "minnun lɛ bɛ, o -taa -a yɩlɛ.

13 Bali -a 'vɩ Abraam lɛ 'nan, 'e "ta fɛ -tʋ -nɔan -yrɛ, ɛn yaa -ci pɛ wluan 'e 'bɔ 'fli da. Kɔɔ fɛ -tʋ "ka -e Bali 'e 'pɛ wluan 'bɛ da, te 'bɛ -dan "mlian Bali da dɩ. 14 -Yee "wɛan yaa 'vɩ Abraam lɛ 'nan:

16 -Te min "ta 'wɩ 'tʋ -ji -pɛ wuanla bɛ, fɛ nɛn -a -dan "mlian "da "bɛ, -a man nɛn 'e 'pɛ wuanla. 'Wɩ zɩɛ -yɛɛ -kɔɔnman 'nan 'wɩ tɩglɩ nɛn yaa 'vɩ, te -sa 'ka "nyian "da "dɩ. 17 'Wɩ zɩɛ -a 'bɔ nɛn Bali -a drɛ Abraam lɛ. 'E 'pɛ wluan 'e 'fli da, 'nan -e minnun nɛn o -taa 'wɩ zɩɛ -a "nɛn "blɩlɛ bɛ, 'o -tɔ 'nan 'wɩ 'kpa nɛn yaa ve. 18 Bali -a 'vɩ Abraam lɛ 'nan 'e "ta fɛ -tʋ -nɔan -yrɛ, ɛn Bali 'e 'pɛ wluan 'wɩ 'tʋwli zɩɛ -a -ji. 'Wɩ "fli zɩɛ -a drɛdɩ -a bɛ, Bali -a kɔɔn -cɛɛ 'nan -te 'e 'wɩ 'vɩ bɛ, 'e 'ci 'ka 'limlan 'li "fo "dɩ. Ɛn ya'a 'kɔlaman -e 'e 'wlu 'sɛn dɩ. 'Wɩ zɩɛ e ya "le -e -kaa "koe "tɔ -kaa da, -e 'wɩ nɛn -kaa yiɛ yra -yrɛ "bɛ -kaa man -pɛn. 19 'Wɩ nɛn -kaa yiɛ yra -yrɛ "bɛ, 'wlu wɩ "cɛɛ dɩ, ɛn -yɛɛ -maan -e -kaa tɔ 'plɛblɛ. Zozi lɛ nɛn -kaa yiɛ yra, ɛn -yɛɛ wla fɛnan nɛn Bali cɩ bɛ -a -nan. 20 Fɛ zɩɛ -a -nan nɛn Zozi -trɔa -kaa 'lɛ, 'nan -e 'e 'pa -kaa 'va. Kɔɔ -yɛɛ drɛ -cee Bali -panzan -dan a, "le zɩ Mɛlcisedɛk cɩ Bali -panzan -a 'li bɛ -yee 'wɩ 'zʋ. Ɛn e -fo -a 'li 'trilii.