2 SAMUEL.
23.
I David nib mo’on ni fak Jesse e ireram fare mo’on ni Got e gagiyegnag nge yan i par nib gilbuguwan, ma fare Got rok Jakob e ir e turguy David ni nge mang pilung, me ir e i tunguy fapi tang rok piyu Israel. Ba’aray e tin tomur e thin ni yog David ni ga’ar: 
Kan nthothup rok SOMOL e be non u l’ugunag; thin rok e bay u daken dap’i l’ugunag. 
Fare Got nu Israel e ke non, en nma yoror rok piyu Israel e ke ga’ar ngog: “Re pilung nma gagiyeg nib yal’uw e ngongol rok, mma gagiyeg ni bay madgun Got u wan’ 
e bod e woch ni be puf ni kadbul ndariy e manileng u lanelang, ma bod e yal’ nma yib ram’en nga daken e pan u tomuren e n’uw me galgal.” 
Irera’ rogon ni bay i ayuweg Got e pi’in owcheg, ya ke ngongliy ba m’ag u thilmow ndabi m’ay, ni urngin riy e be par ni ba yaram ma mmudugil. Kemus e n’en ni gu ba’adag; ni ir e bayi gel nigeg, ya Got e rib mudugil ni bayi gagiyegnag nge yib i m’ug ni aray rogon. 
Machane girdi’ ndariyfan Got u wun’rad e yad bod e rachangal ni yibe n’ag; dariy be’ nrayag ni nge math ngay ndariy ban’en nike ing pa’ ngay. 
Thingar ni fek ba ley i wasey ara ba sarey ngan lik’iy ngay; ri bay ni urfiyrad ngu’ur yik’yik’gad. 
Ba’aray fithingan e pi salthaw rok David ni yad ba gilbugwan: en ni som’on e Josheb Basshebeth nu Tachemon, ni ir e ga’ ko “Fare Dalip”; ni cham ko sarey rok ngak meruk mir’ay i pumo’on nge thang e pogofan rorad u ta’abyay i mael. 
En migid ko fa dalip i girdi’ nib gilbugwan e Eleazar ni be nib mo’on ni fak Dodo, ni be’ ko fare ke girdi’ rok Ahoh. Reb e rran me ir nge David e ra chamgow ngak e pi Filistine ni kar mu’ulunggad ni ngan mael. Me sul piyu Israel riy nga tomur, 
machane me dugil Eleazar nge par u luwan nge cham ngak e pi Filistine nge taw ko ngiyal’ ni kari galuf pa’ ndakiyag ni puf pa’ ko saydon rok. I gel SOMOL ko mael e rofen nem nrib fel’ rogon. Nap’an ni m’ay fare mael, me sul piyu Israel ko gin ni bay Eleazar riy ngar lufed madan e mael ko salthaw u daken fapi ldow. 
En dalip ko fare dalip ni yad ba gilbugwan e Shammah nib mo’on ni fak Agee nu Harar. I mu’ulung e pi Filistine nga Lehi, ko gin ni bay bangi flang ko peas riy. Me mil piyu Israel rok e Filistine, 
machane me dugil Shammah u luwan u lan fagi flang’, nge yoror riy, me thang e fan rok fapi Filistine. Me gel SOMOL ko mael e rofen nem nrib fel’ rogon. 
Ke chugur ni nge tabab e ngiyal’ ni yima t’ar wom’ngin e woldug riy ma dalip ko “Fare Guyey” e yan nga pe’ning ko yiy rok Adullam, ko gin ni immoy David riy, ma ngiyal’nem e bay ba ulung i Filistine ni yad be par u lan e Loway nu Refaim. 
Ngiyal’nem e bay David u daken bangi ted ni kan yororiy ni fan ko mael, ma bay ba ulung i Filistine ni yad be par Bethlehem. 
Ma ke tawrengnag David tafen me ga’ar, “Ri gu be athpeg ni mang e yigi fek be’ bu uw i ran ni yima unum i yib ngog ko fare luwed ni bay u charen e garog nu Bethlehem!” 
Ma fa dalip i salthaw nib gilbuguwanrad e rcham niged wo’rad nga wuru e gin be par e pi Filistine riy, ngar l’inged boch e ran ko fare luwed, ngar sulweged ngak David. Machane de unum David; ya n’en ni rin’ ngay e pu’og nga but’ nib maligach ngak SOMOL 
me ga’ar, “SOMOL, dariy e n’en nra rin’ mu gu unum e pi ran ney! Ya bod ni kug unum racha’en e pi pumo’on ney ni rdowgad ko pogofan rorad!” Ma aram e siyeg ni nge unum. Ireram e pi ngongol ni falu’ ko fa dalip i salthaw nib gilbugwan. 
Abishai e be’ nib pumo’on ni walagen Joab (ni Zeruyah e chitinngirow) e ir e ga’ rok “Fare Guyey i Gilbugwan.” Ya Abishai e cham ko sarey rok ngak dalip mir’ay e salthaw nge thang e pogofan rorad, ma aram me gilbugwan u fithik’ “Fare Guyey.” 
Abishai e th’abi gilbugwan u fithik’ “Fare Guyey”; me par ni ir e i gafaliyrad, machane ir e de bod fini gilburwan “Fare Dalip.” 
Me Benayah nib mo’on ni fak Jehoyada nu Kabzeel e ku reb e salthaw ni kub gilbugwan; bo’or bogi ngongol ko m’uthan’ ni i rin’, nib mu’un l’agruw i girdi’en e mael nu Moab ngay nri yow ba cheag niki thang e fan rorow. Miki bayay me yan ngalan ba low nib to’ar u reb e rran ni be aw e ayis nge thang e fan rok ba lion. 
Miki thang e fan rok be’ nu Egypt, ni be’ nib pumo’on nib ga’ ma bay ba sarey rok u pa’. Me yan Benayah ngak nike fek ba ley i gek’iy nib tomal ni talin e cham rok, me leag Benayah fare sarey u pa’ fare Egyptian, nge rugoy ngak nge yim’. 
Ireram e pi ngongol ko m’uthan’ rok Benayah, ni ir reb “Fare Guyey.” 
Ir e rib cheag u fithik’rad, machane gathi ri bod fini gilbugwan “Fare Dalip.” Me tay David e salthaw ni yad ma matanagiy ni Benayah e be gagiyeg nagrad. 
Kub aray boch i chonggin “Fare Guyey”: Asahel, walagen Joab ni pumo’on Elhanan ni be’ nib pumo’on n fak Dodo nu Bethlehem Shammah nge Elika nu Harod Helez nu Pelet Ira ni be’ nib pumo’on ni fak Ikkesh nu Tekoa Abiezer nu Anathoth Mebunnai nu Hushah Zalmon nu Ahoh Maharai nu Netofah Heleb nib pumo’on ni fak Baanah nu Netofah Ittai nib mo’on ni fak Ribai nu Gibeah ko genong ni Benjamin Benayah nu Pirathon Hiddai ni be’ ko fapi loway nu charen yu Gaash Abialbon nu Arabah Azmaveth nu Bahurim Eleahba nu Shaalbon Fapi pumo’on ni pifak Jashen Jonathan Shammah nu Harar Ahiam nib mo’on ni fak Sharar nu Harar Elifelet nib mo’on ni fak Ahasbai nu Maakah Eliam nib mo’on ni fak Ahithophel nu Gilo Hezro nu Karmel Paarai nu Arab Igal nib mo’on ni fak Nathan nu Zobah Bani nu Gad Zelek nu Ammon Naharai nu Beeroth, cha’ nma fek e talin e cham rok Joab Ira nge Gareb nu Jattir Uriah nib Hittite. Pi salthaw nem ni yad ba gilbugwan e yad guyey nge medlip u gubin.