JOB.
8.
Amog kam mu’ ko gafadrag ni go’ nifeng? 
I Got e dar ma olobochiy e tin nib mat’aw; dariy bangiyal’ nra pag i rin’ e n’en nib mat’aw. 
Dabisiy nike denen pifakam nib togopluw ngak Got, aram fan nike gechig nagrad nib m’ag nga rogon e kireb rorad. 
Machane mu cheal e chiney ngam wenig ngak Got ni Gubin Rayag Rok; 
fa’anra arfanam yul’yul’ nge machalbog, me’ere bayib Got nge ayuwegnem, me fulweg gathon e tabnaw rom nga rogon ni aram puluwom. 
Urngin e fla’ab nike thay u pa’am e dabi ta’reb rogon ko n’en nra pi’ Got ngom. 
A yigum changar bochingiyal’ ko gonop ko pi kakrom; ma ga leamnag e pin’en nib riyul’ ni fil e pi chitamangidad kakrom, 
Yafos rodad e rib ngoch, ri dariy bochi ban’en ni gadad manang; gadad ma thumur ni bod e taglul’ nma th’ab daken e fayleng. 
Machane mu pag e pi’in gonop kakrom ngar llowan’ niged gur; mmotoyil ko n’en ni u rogned: 
“Dabiyag ni nge tugul e uchel u bang ndariy e ran riy; dab ni pir’eg ko gin nde tamran. 
Fa’anra m’ay e ran, ma uchel e som’on nra mororoy, ko ngiyal’ ni kayug ba’achig ndab ka’yag i fanay nga ban’en. 
Girdi’ nde nang Got e yad bod e pi uchel nem; lagan’ rorad e ra m’ay, u nap’an ni yad ra pagtalin Got. 
Be pagan’rad ngabal’ i gaf ni tafen e gonow. 
Fa’an yad ra gif nga ba tafen e gonow, ma gur, ra duwgiliyrad ni dab ra thiggad? Fa’an yad ra malle’ nga bael’ i tret, ma ra yuwegrad ngar sak’iygad?” 
Girdi’ nib kireb e ma for ni bod e pan u tamal’, ni bod e pan ni be yo’or i yan u daken e milay’. 
Liknginrad e ma bachbach ko malang me l’ag nib nemow nga gubin e war. 
Machane ga ra bukliyrad ngalang ma dariy be’ nra nang ni urmed u rom. 
Errogon, kemus rogon e felfelan’ rok e girdi’ nib kireb; ma aram me yib yu gu boch e girdi’ nge fek luwanrad. 
Machane Got e dariy e ngiyal’ nra pag e pi’in yad ba yul’yul’ ara pi’ e ayuw ngak e girdi’ ni kireb. 
Bayi pagem ngam minmin mag garus bayay, 
machane bayi m’ay nagfan e pi’in yad bfananikayem, ma pi tabnaw rok e pi’in kireb e bay i may ngabang.