JOB.
12.
Errogon, gimed e gimed be yog lungun e girdi’. Gimed ra yim’, me mathmit e gonop. 
Gadad e ta’reb rogon e tin gadad manang; dariy ban’en ni gimed ba cheag riy ngog; go’ yi manang urngin e pin’en ni kamogned. 
Mus ngak e pi tafager rog ma ku gu mang bmakak’ar ngorad; yad be minmin ngog, ni yug aram rogon ni gub mat’aw ni dariy thibngig; ma immoy bingyal’ nma fulweg Got taban e meybil rog. 
Gimed e dawori aw e gafgow ngomed, ma be makakar’anmed ngog; ra be tuturpel be’ mi gimed thuruy. 
Pi’in ma moro’ro’ u fithik’ e yargal nge pi’in dar nanged Got e yad be par u fithik’ e gapas, ni yug aram rogon ni gelingrad e kemang got rorad. 
Bo’or ban’en ni gimed ra fil rok e arche’ nge gamanman; 
mu fithed gubin mit e yafos nu arow ngar filed ngomed; nge nig nu maday ngar tamilang niged gimed riy. 
Go’ yad manang ni pa’ SOMOL e sunumiyrad. 
Gubin ban’en nib fos ma bay u lan pa’ Got; nge pogofan ko girdi’. 
Teliy e ma sikengnag e thin nike rung’ag, ni bod rogon blothey nma ri’ lamen e ggan. 
Gonop nge tamilangan’ e bay rok e pi’in ke ilal, ya ke n’uw nap’rad. 
Ma Got e bay e gonop rok ma ba gel gelngin; ma ba tanom ma ir e manang. 
Ra buthug Got nga but’, ma mini’ e rayag niki toy, me mini’ e rayag rok ni pag e en Got e ke kalbusnag? 
Ra kol Got e n’uw me fengfeng e nam; me pithig pa’ riy me sugbur e nam. 
Got e ba gel ma gubin ngiyal’ nma par nib gel; en ni kan bannag nge en ke ban e go’ yow bay u tan gelngin. 
Ir e ma chuweg e gonop rok e pi tagagiyeg mma gagiyegnag e pi’in yad ma yog e thin ngu’ur ngongoliyed e ngongol ko balyang. 
Ir e ma chuweg e pilung u tagil’rad nge kalbus nagrad; 
me sobut’nag e pi prist nge pi’in nib gel gelingrad. 
Ma th’abgulungan e pi’in nib pagan’uy ngorad, mma chuweg e gonop rok e pi’in pi’lal. 
Ma dariyfannag e pi’in bay gelingrad ma moseg gelngin e pi tagagiyeg. 
Ma pi’ e tamilang ko yungin nib rimug ni yam’. 
Ma gelnag e pi nam nge gilbuguwrad, ma ir e ma waer nagrad nge thirifrad u but’. 
Ma balyangnag e pi’in ma yog e thin rorad me pagrad ngu’ur derawgad nike minan’rad ma ka ra maloggad; 
yad be gorbal u fithik’ e lumor ma yad be thigthig ni bod e chingaw.