JOB.
24.
Mangfan nder duwgiliy Got ngal’an e pufthin, ni reb e rran ko pufthin ni fan ko pi’in yad ma pigpig ngak? 
Girdi’ e yad ma gachachag e mathil ni nge ga’ e binaw rorad; yad ma iring e saf ngar puthuyed ko yu ran’ i gamanman rorad. 
Yad ma fek e dongki rok e pi’in kanim’ rorad, ma yad ma tel e garbaw rok e en ke yim’ figirngin nge taw ko ngiyal nike thang e malfith rok. 
Yad ma taleg mat’wun e gafgow miyad mod yargel ko pi’in gafgow ngar milgad ngar mithgad. 
Ere pi’in gafgow e yad bod e dongki ni malboch, ni yad ma gey e ggan u daken e ted; ni bochan e dariy bang ni yad ma pir’eg e ggan riy ni nge kay pifakrad. 
Yad ma t’ar wom’ngin e woldug ni gathiyad e fi’irad, miyad kunuy e grape u lan e milay’ ko pi’in kireb. 
Me nep’ miyad mol ndariy e gulgul rorad, dariy ban’en ni nge ayuwegrad ko ulum. 
Ka ra maygu’gad ko n’uw nma aw u daken e burey, ngu’ur chichirgad nga fon e war nike mang manaf ngorad. 
Girdi’ ni kireb e yad ma fek e madway ni dariy e chitamngin ni nge mang sib miyad fek pifak e pi’in gafgow ni labgen e malfith. 
Ma pi’in gafgow e yad be yan ndariy e mad u dakenrad ni nge upnguyrad; ma yad bmak’iy ko ngiyal’ ni yad be t’ar wom’ngin e wheat. 
Yad ma uduy e olive ni nge yag e oil riy, nge grape ni nge mang wayin, ma yad e yad be yim’ ko balel. 
U lan e pi binaw e be go’go’ e pi’in maad’ad nge pi’in be chugur ni ngarm’ad, ma Got e be sabalbalyang ko pi meybil rorad. 
Bay e girdi’ ni kar pi’ed keru’rad ko tamilang; darir nanged fan ma darir leked e gin be sor ngay. 
Ra puf e woch me od e en ma thang e pogofan nge yan ni nge thang e fan rok e gafgow, me nep’ me moro’ro’. 
En nma kol e bpin fa pumo’on rok be’ e ma son ni ngeling e yal’; ma mithag owchen nge dab ni poy. 
Nep’ e ma yan e mororo’ ngalan e pi naun, me rran miyad mith ni dabrabad ko tamilang. 
Ma yib loren e tamilangen e rran ngorad, ma lumor e darir rusgad ngay. 
Be’ nib kireb e ma un ko ran nike sugbur nge man’, ma re gi binaw ntafen e bay u tan e buchwa’athan rok Got; dakir maruwel u lan e milay’ rok ni grape. 
Bod e ayis ni m’ay nga bang ko gowel nge yal’ ni gel, e aram rogon be’ nib tadenen nra chuw ko binaw ni tafen e pi’in nib fos. 
Mus ngak e chitiningin ma ke pag talin e chiney; ya ke longuy e faklud ma ke mogothgoth ni bod e gek’iy nike thig. 
Ke buch rok ni ara’ rogon ni bochan e be gafgownag e pi’in ke yim’ figirngirad ma de gol ngak e pi’in ppin ndariy pifakrad. 
Gelngin Got e thang mit e pi’in ba gel gelngin; ra gagiyeg Got — me yim’ e pi’in kireb. 
Mang e ra pag Got facha’ nge par ni dabi buch ban’en rok, machane ma yip’ owchen ngak ni gubin ngiyal’. 
Bochngiyal’ e ma fel’ rogon fa en kireb, machane me mororoy ni bod bake pan, ara bod ba kenggin e grain ni ka ni th’ab nga but’. 
Gur, rayag ni yag be’ ni gathi aray rogon? Rayag rok be’ ni nge micheg nde riyul’ e pi thin ney ni gu be yog?