JOB.
29.
Job ni tabab ko welthin bayay. 
Mang e yigki sul e yafos rog nga rogon ko ngiyal’ ni ba’aram ni i aywegneg Got. 
Ngiyal’nem e immoy Got rog ni gubin ngiyal’ mi i pi’ e tamilang ngog u nap’an ni gu be yan u fithik’ e lumor. 
Aram e pi rran ni i fel’ rogog riy, ma thilmow Got ni i par ni bfel’ e i yororiy e tabnaw rog. 
Got ni Gubin ma Rayag Rok e immoy rog e ngiyal’nem, ma u gu par nib longobiyeg gubin pifakag. 
Pi garbaw nge kaming rog e ur pi’ed e milik nib yo’or, ma gak’iy ni olive ni fi’ig e i tugul ko but’ nib tamlang. 
Gubin ngiyal nma mada’ e pi’ ilal ko fare binaw mu gu wan gu par nga tagal’ig u fithik’rad, 
pi’in pagel e yad ma gulo’ ko ngiyal’ ni kar guyedgag, ma pi’in ke pumo’on e yad ma sak’iy ngalang ngar tedfag. 
Ma pi tayugang’ e yad ma tal ko numon; 
ni mus ko pi’in th’abi tolang ma ku yad ma thabgulungrad. 
Urngin e pi’in yad ra guyeg fa rrung’aged murung’ageg e bay e tin yad ma yog ni bfel’ ni ku gu rin’. 
Nap’an nra yor e pi’in gafgow ngalang, mu gu aywegrad; gu ma pi’ e ayuw ko pi’in kanim’ rorad ndariy e gin ngar sorgad ngay. 
Girdi’ ni karbilged t’ay e gafgow e yad ma athpegeg, ma gu ma ayweg e pi’in ke yim’ figirngirad nge dabi buch ban’en rorad. 
Urngin ngiyal’ ma gu ma ngongol nib mat’aw ma dagur lanyan’. 
Gu ma mang owchen e malmit, nge rifrifen ay e mugutgut. 
Gu bod rogon ba matam ngak e pi’in gafgow ma gu ma pi’ e ayuw ngak e pi milekag nike l’ag e oloboch ngorad. 
Gu ma kirebnag gelngin e pi’in buchan’ mu gu ayweg e pi’in yibe gafgow nagrad. 
Gubin ngiyal’ ni ug leamnag ni gu ra par nge n’uw nap’ag ma gu ra yim’ u tabnaw rog ni gub munguy. 
Bod rogog ba ke gak’iy ni bay lik’ngin u fithik’ e ran ni gubin ngiyal’ ma papa’ngin e be par nib monur ko wa’angchal. 
Gubin ngiyal’ nma pining e girdi’ e sorok ngog, ma der ma waer gelngig bingyal’. 
Nap’an ni gu ra pi’ e fnow, ma thab e girdi’ gulungrad ngar fal’eged e motoyil ko mang e gu be yog; 
dariy ban’en ni yad ma puthuy ngay ko ngiyal’ ni ku gu mu’ ko numon. Ma rich e thin rog nga fithik’ i lanin’rad ni bod e wa’angchol ko n’uw; 
urngin e girdi’ ma ba’adag e thin rog nri bod rogon e girdi’en e milay’ nma finey e n’uw ko nap’an e yal’. 
Nap’an nra maruweran’rad ni gu siminmin ngorad; ma felfelan’ u owcheg e ma pi e athmagil ngorad. 
I gag e gu ma gagiyegnag e tin ngar rin’ed gu ma gafaliyrad ni bod ba pilung nma gafaliy e yu raba’ i salthaw rok, gu ma fal’eg lanin’rad u fithik’ e gafgow rorad.