JOB.
37.
Bang i lang nib gel e ma pug e marus rog. 
Mmotoyilgad, ni gimed gubin, nga laman Got, ni dirra’ ni be yib u langan. 
Ma pi’ e uluch nge th’ab lanelang, u barba’ e fayleng nge thang nga barba’. 
Ma aram mini rung’ag ga’ngin laman, nib lingan dirra’ nib ga’, ma aram n’umngin nap’an ma yug be mat e uluch. 
Yugra pag Got lungun me buch bogi ban’en ni yira ngat ngay, bogi ban’en ni bfel’ ma dab dananged fan. 
Ma yog ko ayis ni nge aw nga daken e fayleng, mma pi’ e n’uw nge aw nib almirin. 
Ir e ma taleg e maruwel rodad; ma dag ngodad ko mang e rayag rok. 
Gamanman ni malboch e yad ma yan nga taferad. 
Nifngin e yoko’ e ma yib ko yimuch, me yib e garbeb ko lel’och. 
Pogofan rok Got e ma garbebnag e ran nge el, me pilyeg nge ngal’ ni ayis. 
Uluch e ma mat u fithik’ e manileng, 
nma mat ni bod rogon ni ba’adag Got. Yad ma rin’ gubin e tin ke tay Got chiylen, u ga’ngin yang u fayleng. 
I Got e ma pi’ e n’uw ni nge tarannag e fayleng; ma pi’ ni nge gechignag e girdi’, fa nge dag ngorad nib gol. 
Job, aygumtal boch ngiyal’, ngam motoyil; ma ga leamnag e pin’en ni bfel’ nma rin’ Got. 
Ga manang rogon nma non Got me mat e uluch u fithik’ e manileng? 
Ga manang rogon nma man’ e yung i manileng u lanelang, nge maruwel rok Got nib pag feni salap? 
Danga’, kemus ni ngam gafgow ko gawel u nap’an nra yib nifngin e yimuch ni nge mliknag e but’. 
Mog rayag rom ni ngam ayweg Got i fileth lanelang nge par nib el ni bod e wasay ni kan gichiy? 
Mu fil ngomad e n’en ni ngogned ngak Got; ya keman lanin’mad; dakriy e n’en ngogned. 
Dab gu de’eriy ni nggu non ngak Got; mangfan ni nggu k’aring nge thangeg? 
Ma chiney e ra’en lanelang e be matmat, ni kaygi gel ra’en ni dabkiyag ni ngad changargad ngay; ke walguy e nifeng ke tamilang. 
Kaniguy ba ra’en nib maluplup u lan e lel’och, ma fal’ngin Got e ke suguydad ka da ngatgad ngay. 
Gelngin Got e rib gel ni dabyag ni ngad chugurgad ngak; ir e bmat’aw ma ba yal’uw rogon nma farwoliy e girdi’. 
Aramfan, ni gubin e girdi’ nma ngat ngak; mma fek owchen rok e pi’in yad ma yog ni yad ba gonop.