JOB.
39.
Ga manang e ngiyal’ ni be gargel e kaming nma par u daken e burey? Ka’a mu yaliy e dir ni malboch ni be gargel? 
Ga manang urngin pulrad ko diyen, miyad gargel? 
Ga manang e ngiyal’ ni ngar tbalawgad nga but’ ni ngar gargel niged fakrad nga fayleng? 
Pifakrad e ma ilal nge ga’ u magargar; miyad chuw ngranod ni dab ku ra sulod. 
Mini’ e tay e dongki ni malboch ni yad e mmil farad ngorad? Mini’ e pithig gafrad nge pagrad yad be gurul? 
Ku gu pi’ e ted ni desert ngorad ni nge mang taferad, ma ku gu pagrad ngu’ur pired ko yungin der tugul e pan riy. 
Ka ra pired u orel ko pi binaw ni yibe mayngar riy, ma dariy be’ nrayag rok ni mangmor nagrad nge maruwel ngorad. 
Pi burey e aram e yungi n’en ni yad ma abich riy, ni aram e gin yad be gay ban’en nib galunglung riy ngar ked. 
Rayag ni nge maruwel ba garbaw ni malboch rom? Gur ra m’agan’ ngay ni nge par u tafen e gamanman rom ni reb e nep’? 
Rayag ni ngam m’ag e gaf nga reb nge gi’ e but’? Ara girengiy fen e bilbil but’ u daken e yungi flang rom? 
Rayag ni ngam gif nga gelngin nib gel nga mu pagfan e tin nib mo’maw’ e maruwel rom ngak? 
Ga ma pagfan ngak ni nge gachowriy wom’ngin e woldug rom nga naun, me kunuy e grain ko gin yima gunugunuy riy? 
Arche’ ni ostrich e rib machreg pon nma furfuruy! Machane dariy ba ostrich nra yag rok ni nge changeg ni bod ba arche’ ni stork. 
Arche’ ni ostrich e ma pag e tamango rok u daken e but’ ni bod pifak e nimen ndawori bilig ni nge mang gowel ni be yib u fithik’ e but’ e i gowaliy. 
Ma de nang nrayag ni nge yib ba rifrif i yot’ ara yib e gamanman ni malboch i bilig. 
Ngongolen e gowa gathi pifak fapi tamango, ma der magfan’ nri m’ay fan ni i thay parwon riy. 
I gag e gu gagiyegnag nge par ni aram rogon nib balyang, ni da gu pi’ e gonop ngak. 
Machane nap’an nra tabab ni nge mil, mi i minmin ngak e os nge en ni bay u daken. 
Mog, i gur e mu pi’ gelngin e pi os me gur e mu tay fapi piy nma gafgaf u daken belel’ugunrad? 
Mog, i gur e mu tayrad ni ngu’ur tim’oggad ni bod e asmen’ing ma be rus e girdi’ nga lingan p’ethungrad? 
Yad ma yan u lan e loway ni yad ba pasig nrogon e os; yad ma mil i yan nga mit e mael nike musmus nga rogorad. 
Dar nanged e marus, ma dariy ba saydon ni yad ra sul riy nga tomur. 
Talin e cham nma fek e pi’in yad bay u daken e pi os nem e ma garal lingan mma gal ra’en u tarama’en e yal’. 
Ra thow e rappa ma dabiyag ni ngar mot’gad; miyad sagreng ni yad be chigar i yan nga m’on. 
Pi lingan e rappa nem ni be thow ma be thoy e pi os nem p’ethungrad; rayag ni ngar faraboned e cham ndawor ra chugurgad ngay, ma yad ma rung’ag lungun e pi tolang ko salthaw ni yad be tolulnag e tin ngan rin’. 
Mog, i gur e i fil e arche’ ni hawk rom rogon ni ngi i changeg nra pithig pon ma ba sor ko yimuch? 
Mog, i gur e ma son nigem ba arche’ ni eagle ni nga fini mog ngak me yan i toy tafen nga daken e burey? 
Eagle e ma yan i toy tafen nga daken e pi war th’abi tolang, nge mang bugul e war nib m’uth e yoror rok. 
Aram e gin ma par riy ngi i changar nga chugur nge nga orel ni nge guy ban’en ni nge li’ nge longuy. 
Arche’ ni eagle e yad ma mu’ulung nga ban’en nike yim’, me pifakrad e ma unum e racha’ riy.