PSALMS.
9.
SOMOL, bay gu pining e magaer nge sorok ngom u polo’ i lanin’ug; Bay gu weliy murung’agen gubin ban’en ni bfel’ ni kam rin’. 
Bay gu tang ni kug uf ni bocham. Bay gu tang ni gu be pining e sorok ngom, i gur Got ni Gubin ma Rayag Rok. 
Pi to’ogor rog e ra sulod nga wuryel u nap’an ni mub mm’ug; miyad thig nga but’ ni karm’ad. 
Ga ba mat’aw ma gab yul’yul’ ko pufthin ni ga ma tay, ma gur e kam duwgiliy ni gub mat’aw. 
Kam puwan’ ngak e pi nam, ma kam thang owchen e pi’in kireb; dab kurbad ngan’uy bingyal’. 
Ke math owchen e pi to’ogor rodad ni dariy n’umngin nap’an; ma kam gathay e pi binaw rorad’; dakriy bingyal’ ni ku yad ra yib ngan’uy. 
Machane SOMOL e pilung ni manechibog; ke fal’eg rogon gil’ilungun ko pufthin. 
Be gagiyegnag e fayleng nib yal’uw rogon; ma pufthinnag e pi nam nrogon nib mat’aw. 
SOMOL e manaf rok e pi’in yibe gafgow nagrad, ni aram gil’ e ayuw ko ngal’an e gafgow. 
SOMOL, pi’in yad manangem e ra pagan’rad ngom; cha’ nra yib ngom e ri dab mu n’ag. 
Ngan tangnag e sorok ngak SOMOL, ni ir e ma gagiyeg u Zion! Ngan weliy ngak gubin e nam e tin ke rin’! 
I Got e der ma pagtalin e pi’in gafgow, der ma pagtalin e meyor rorad; mma gechignag e pi’in yad ma rin’ e kireb ngorad. 
SOMOL, mu runguyeg! Mu guy e gafgow ni be k’aring e pi to’ogor rog ngog! SOMOL, mu lagneg u pa’ e yam’, 
ya nge yag ni gu sak’iy nga p’eowchen e girdi’ nu Jerusalem nggu weliy ngorad urngin ban’en ni gu be pining e sorok riy. Bay gu felfelan’ ni bochan e kam mat’aw nigeg. 
Pi nam e ka ra mulgad ngalan e low ni yad e ra kired; ka ra awgad ko wup rorad. 
Ke gagiyegnag SOMOL kannang ko ir mini’ u daken e pufthin rok nib mat’aw; ma pi’in kireb e ke tafchiyrad e ngongol rorad. 
Yam’ e ir ra yan i mus e pi’in kireb ngay, ni gubin e pi’in nra paged Got. 
Ma pi’in bt’uf e ayuw rorad e gathi gubin ngiyal’ ni yira pagtilrad; ma n’en nma l’agan e pi’in gafgow ngay e dabi par nib masengseng ni dariy n’umngin nap’an. 
SOMOL, mu sak’iy! Dab mu pag e girdi’ ngar feked yathim! Mfek e pi’in dammich u wan’rad nga p’eowchem nga mog e gechig rorad. 
SOMOL, mu k’aring e morus ngorad; mu gagiyegnag ngar nanged ni yad e kemus ni girdi’.