PSALMS.
10.
SOMOL, mangfan ni ka mu par u orel? Mangfan ni ga be mith ko ngiyal’ nike yib e oloboch ngomad? 
Pi’in kireb e yad ba tolangan’ ma yad be gafgownag e pi’in gafgow; mpagrad ngar awgad ko fapi wup ni kar ngongliyed. 
Pi’in kireb e yad ba uf ko pi ar ar rorad ni kireb; pi’in chogow e yad ma yog e thin ni kireb ngak SOMOL miyad pi’ keru’rad ngak. 
Pi’in kireb e dariy fan SOMOL u wan’rad; mu fithik’ e tolngan’ rorad e yad ma leamnag ni dariy rogon Got. 
Pi’in kireb e ma fel’ rograd ko tin yad ma ngongliy. Ya dar nanged fan rogon e pufthin rok Got; ma mad ma girig ko pi to’ogor rorad. 
Yad ma ga’ar u wan’rad, “Dab da waergad bi’id; ma dab da mada’ niged e magawon bingyal’.” 
Welthin rorad e ba sug ko yaba’, nge ban, nge thin ni yargal; ma ba papey ni yad ma yog e thin nra kirebnag lanyan’ be’, nge thin ni kireb. 
Yad ma mith u lan e binaw i yan, ni yad ma son ni ngar thanged e fan rok e pi’in dariy ban’en ni kar bucheged. Yad ma mith ngu’ur damit naged e pi’in dabiyag ni ngar ayuwegedyad; 
yad ma son ko gin ka ra mithgad riy ni bod e pi layon. Yad ma pach ni yad be sonnag e pi’in gafgow; miyad kolrad ko wup rorad miyad girngiyrad ngabang. 
Fapicha’ ni ka ni kolrad e kar masengseng gad u but’; mirin gelngin e yargel e ke li’ rad. 
Pi’in kireb e yad be yog rorad ni yad be ga’ar, “Dariyfan u wan’ Got! Ke moleg owchen ni dabi guydad!” 
SOMOL, mu gechignag e pi girdi’ ni kireb nem! Dab mu pagtalin e pi’in yad be gafgow! 
Bu uw rogon e pi’in kireb ni yad be fananikay Got ma yad be ga’ar u lanin’rad, “Got e dabi gechig nagdad”? 
Machane ga be guy; ga be yaliy e oloboch nge gafgow ma urngin ngiyal’ ni ka mu fal’eg rogom ni ngam pi’ e ayuw. Pi’in dabyag rorad ni ngar ayuwegedyad e ka ra pi’edyad nga pa’am; gubin ngiyal ni ga ma ayweg e pi’in ni ba t’uf e ayuw rorad. 
Mu kirebnag gelngin e pi’in kireb nge pi’in nib kireb e leam rorad; mu gechig nagrad ko kireb ni karrin’ed, nge taw ko ngiyal’ ni ka ra talgad i rin’. 
SOMOL e pilung ni manechibog ko pichibog. Pi’in yad ma tayfan yugu boch e got e bay ra chuwgad u daken e but’ rok. 
SOMOL, bay mmotoyil ko meybil rok e pi’in ba sobut’; bay mpi’ e athamgil nga lanin’rad. 
Bay mu rung’ag e meyor rok e pi’in yi be gafgow nagrad nge pi’in kanim’ rorad; bay mu duwgiliy ni yad bfel’, ya nge tal e girdi’ ni dab kur k’arnged e marus ngorad.