PSALMS.
21.
A SOMOL, kefel’ u wan’ e en pilung ni kam pi’ gelngin; ke felfelan’ ni bochan e kam gelnag ko pi mael. 
Gur e kam pi’ ngak fiti laniyan’; kam pi’ ngak e n’en ni i ning. 
Kamub ngak ni ngam fal’eg wa’athan nib gel ma kam tay ba te’elyaw ni gol nga lolugen. 
Ke ning e yafos ngom, ma kam pi’ ngak, ba yafos nib n’uw ma dabi mus bi’id. 
Kari gilbuguwan ni bochan e ayuw rom; kam gilnag buguwan ma kam gelnag gelngin. 
Pi fal’eg wa’ath rom e bay rok ni dariy n’umngin nap’an, mab sug ko felfelan’ ni bochan ni ga bay rok. 
Fare pilung e ba pagan’ ngak SOMOL ni Gubin ma Rayag Rok; ma bochan e runguy rok SOMOL ngak ndabi thil bi’id, ma bayi par ni gubin ngiyal’ ni dabi buch ban’en rok. 
Bayi kol fare pilung gubin e pi to’ogor rok; bayi kol gubin e pi’in yad be fanenikay. 
Bayi thangrad ni bod ba nifiy ni be daramram, u nap’an nra yib i m’ug. Bayi ful’rad SOMOL u fithik’ e damumuw rok, ni bod nra yik’gad ko nifiy ni be daramram. 
Dariy ta’reb e pi’in owcharad nra fos, fare pilung e ra li’rad ni yad gubin. 
Yad be puruy’nag e tin ba kireb nib togopluw ngak, machane dabi m’ag ngabang. 
Bayi pag gan e gat’ing rok ngorad ngar chelgad ngar milgad. 
SOMOL, gamad be pining e sorok ngom, ni fan gelngim nib gel Bay gu tang niged feni sorom nge fanam gel.