PSALMS.
31.
SOMOL, ku gub ngom ni ngam yororiyeg; dab mu pageg bangiyal’ nggu waer. Gur e ga ba Got nib mat’aw; gu be meybil ni ngam ayuwegneg! 
Mmotoyil ngog! Mu ayuwegneg e chiney! Mu mang manaf rog ngam ayuwegneg; mmang rungrung ngog ngam yororiyeg! 
Gur e manaf rog nge rungrung rog; mu pow’iyeg mu gafaliyeg ni bod ni mu micheg. 
Mu teg u oren ko fare wup’ ni kan tay ni nggu aw ngay; mu rungrunguyeg ko riya’. 
Ku gu pagfag ngom. SOMOL, I gur e bay mu ayuwegneg; gur ba Got ni gab yul’yul’. 
Ga ba fananikay e pi’in yad ma tayfan e tin de riyul’ e got, machane gag e ba pagan’ug ngom. 
Ri bay gu uf mug felfelan’ ni bochan e t’ufeg rom ni dabimus. Ga be guy e gafgow rog; ga manang e oloboch rog. 
Ma dawor mu pi’eg nga pa’ e pi to’ogor rog; kam pi’ matwog ni nggu waen ko gin gu be finey. 
SOMOL, mu runguyeg, ya kug aw nga fithik’ e gafgow; ke thow owcheg ko meyor ni almarin; ma kari thay parwog. 
Ke li’eg e kireban’, ma meyor e ke ngochnag e yafos rog. Ku gu me’waer u malngin gubin e gafgow rog; ma ku be ma’m’ay yileg. 
Urngin e pi to’ogor rog, ma ri pi’in gamad bbuguliyoror, e yad be changar ngog nga but’. Pi’in yad manangeg e yad be tamdag ngog; nap’an ni yad ra guyeg u lan e kanawo’ miyad mil. 
Gubin e girdi’ ma kar paged talig, ni gowa kugum’; gu bod ban’en ni kan’ag. 
Gu be rung’ag e kathkath ko to’ogor ni yo’or; ke ingeg e morus ni gel. Yad be purpuruy’ nib togopluw ngog, yad be makath ni ngar thanged e fan rog. 
Machane ba pagan’ug ngom, A SOMOL; gur e Got rog. 
Gubin ngiyal’ ni gu bay u lan pa’am; mu chuwegeg u pa’ e pi to’ogor rog, ni pi’in yad be gafgow nigeg. 
Mu changar ko tapigpig rom u fithik’ e runguy rom; mu aywegeg u fithik’ e t’ufeg rom ni dabimus. 
SOMOL, gu be piningem; dab mu pageg nge ma’fag. Nge mang e pi’in kireb e nge ma’farad; mang e ranod nib m’ath gulungrad i yan nga but’ ko fare fayleng ko yam’. 
Mu th’abgulungan e pi felfel’lugun nem — gubin e pi’in tolngan’ ma yad ba ufanthin ni yad be non ni yad be dariyfannag e pi’in nib mat’aw. 
Rib th’abi fel’ e tin ga ma cha’riy ni fen e pi’in yad ma liyor ngom! Go’ yimnang fanam gol, rib fel’ rogon ni ga ma ayuweg e pi’in nib pagan’rad ngom. 
Ga ma mithagrad u p’eowchem ndariy ban’en nra buch rorad rok e pi makath ko girdi’; kam mithagrad nga tan ba manaf ndabi buch ban’en rorad ko pi yaba’ ni be tay e pi to’ogor rorad. 
Ngan pining e sorok ngak SOMOL! Ya rib th’ab feni fel’ rogon ni be dag e t’ufeg rok ngog u nap’an nni cholongbiyeg ni ngan og ngog! 
Gu rus mu gu leamnag nike chuwegeg u p’eowchen. Machane me rung’ag e meyor rog nnap’an ni gu pining ni nge ayuw. 
Mu t’ufegned SOMOL, gimed gubin pi girdi’en ni gimed ba yul’yul’. SOMOL e ma yoror rok e pi’in ba yul’yul’, machane ma gechignag e pi’in tolangan’ nrogon ni nge aw ngorad. 
Mu gel niged gimed, me muthan’med, gimed gubin e pi’in nike lagan’med ngak SOMOL.