PSALMS.
34.
Gubin ngiyal’ ni bay ug pining e magaer ngak SOMOL; ma bay ug pining e sorok ngak ndab gu tal. 
Bay ug pining e sorok ngak ko tin ke rin’; mang e yigi gubin e pi’in yibe gafgow nagrad e ngar motoyilgad me felan’rad! 
Mu uned ngog ngad weliyed ngak e girdi’ feni sorok SOMOL; marod ngad pininged e sorok nga fithingan! 
Gu meybil ngak SOMOL me fulweg taban e meybil rog; i chuweg urngin e marus rog. 
Pi’in yibe gafgow nagrad e yad ra changar ngak miyad felan’; ya ri dabi m’ingan’rad. 
Pi’in ndabiyag ni ngar ayuweged yad e yad ra non ngak, me fulweg lungrad; me chuwegrad u fithik’ urngin e gafgow nike yib ngorad. 
Engel rok e ma matanagiy e pi’in bay madgun SOMOL u wun’rad, me chuwegrad ko riya’. 
Mu gay ngam pir’eg feni manigil SOMOL. Ba felan’ e cha’ ni be naf nga tan pa’! 
Gimed urngin e girdi’ rok SOMOL, e ngam pired ni bay madgun u wun’med; ya pi’in bay madgun u wun’rad e bay rorad urngin e tin nge yag ngorad. 
Mus ngak e pi layon ni m’ay garad nge yib e bilig ngorad, ma pi’in yad be fol rok SOMOL e gubin ban’en ni bfel’ ma bay rorad. 
Mired, pifakag, ngam telmed ngog, nggu fil ngomed ni ngu’um pired ni bay madgun SOMOL u wun’med. 
Mogned, gimed ba’adag ni ngam felfelan’gad ko biney e tamilang? Gimed ba’adag ni nge n’uw nap’an ni gimed bfelfelan’? 
Fa’anra gimed ba’adag me ere dab ku mogned e thin nib kireb, ma dab ku mu lifithed l’ugunmed. 
Mpi’ed keru’med ko kireb ngam rin’ed e tin ni bfel’; mu nameged e gapas u polo’ i gum’ircha’med. 
I SOMOL e ma yaliy e pi’in yad bmat’aw, mma rung’ag e meyor rorad; 
machane ma togopluw ngak e pi’in yad be rin’ e kireb, ma nap’an ni yad ra yim’, mi ni pag talinrad. 
Ra non e pi’in nib mat’aw ngak SOMOL me motoyil; me lagrad u fithik’ urngin e oloboch rorad. 
I SOMOL e ba chugur ngak e pi’in ke mulan’rad; mma ayuweg e pi’in dakriy ban’en ni be lagan’rad ngay. 
En nib mat’aw e bo’or e gafgow nma yib ngak, machane SOMOL e ma chuweg u fithik’ ni gubin. 
I SOMOL e ma dunobiy, ni dariy ta’reb e yil rok nra m’ing. 
Kireb e ir e ra thang e fan rok e pi’in kireb e leam rorad; pi’in yad be fanenikay e pi’in nib mat’aw e bay ni gechig nagrad. 
I SOMOL e ra ayuweg e pogofan rok e pi tapigpig rok; ma dabi gechignag e pi’in yad ra yan ngak ni ngar nafgad nga tan pa’.