PSALMS.
47.
Girdi’en urngin e nam, mu waywaygad ko felfelan’! Mu pininged e magaer nge sorok ngak Got u fithik’ e tang ni ba ga’ lammed! 
I SOMOL, ni ir e ba Th’abi Tolang, e ngan dugow ngak; i ir ba pilung ni th’abi ga’, ni be gagiyegnag e fayleng ni polo’. 
Ke ayuwegdad kad gelgad ngak girdi’en e pi nam, ke taydad ni ngad gagiyeg niged e pi nam. 
I ir e turguy e nam ni gadad be par riy, ba nam nib uf e girdi’ rok ngay, ni girdi’ nri yad ba t’uf rok. 
Got e ke yan ngalang nga tagil’! Min tolulnag e felfelan’ me thow e rappa ni be yan SOMOL ngalang! 
Mu pininged e magaer nge sorok ngak Got u fithik’ e tang; mu pininged e magaer nge sorok ngak e pilung rodad u fithik’ e tang! 
Got e ir e pilung ko fayleng nib polo’; mu pininged e magaer nge sorok ngak u fithik’ e tang! 
Got e ke par nga but’ u tagil’ nib thothup; be gagiyegnag e pi nam. 
Pi pilung ko pi nam e kar mu’ulunggad girdi’en fare Got rok Abraham. Ba gel gelngin ngak urngin raba’ e salthaw; ir e be gagiyegnag urngin ban’en!