PSALMS.
50.
SOMOL ni fare Got ni Gubin ma Rayag Rok e be non; be pining e fayleng ni ga’ngin ni tabab ko ngek nge yan i mada’ ko ngal. 
Be mat ram’en Got u Zion, fare binaw ndariy thibngin ngaf ni fel’usun. 
Got rodad e be yib, machane gathi be yib ndariy lingan; ya bay ba nifiy ni be daramram nib m’on rok, ma bay bangi yoko’ ni ba liyeg. 
Be pining e tharmiy nge fayleng ni ngar mangew mich ni yow be guy ni be pufthinnag e girdi’ rok. 
Be ga’ar, “Mu kunuy ngog e girdi’ rog nib yul’yul’, ni pi’in nra ngongliyed ba m’ag u thilmad ko maligach nra pi’ed.” 
Tharmiy e be weliy feni bmat’aw Got, ya ir e ma pufthin. 
“Mmotoyilgad, e girdi’ rog, ya nggu non; Israel, gur e bay gu welthin nib togopluw ngom. Gag Got, ni Got rom. 
Dagur puwan’ ngomed ni bochan e pi maligach romed nge pi maligach ni mo’oruf ni gimed be fek i yib ngog ni gubin ngiyal’. 
Dawor gum’ ni bochan e pi garbaw ni pumo’on ko yungi milay’ romed ara pi kaming u fithik’ e yuran’ i gamanman romed; 
ya gubin e gamanman u loway e ba milfan ngog nge garbaw u daken yu biyu’ i burey. 
Urngin e arche’ ni malboch e ba milfan ngog nge urngin e ban’en nib fos u lan e flang. 
“Fa’anra manga kug k’iy, ma dab gu man ggan ngomed, ya fayleng nge urngin ban’en riy e bmilfan ngog. 
Gur, gu ma longuy ufin e garbaw ni pumo’on, ara gu ma unum racha’en e kaming? 
Ogmagaer e nge mang maligach romed ngak Got, mu pi’ed ngak e en ni Gubin ma Rayag Rok gubin e tin ni kam og niged. 
Mu piningedgag ko ngiyal’ nra yib e oloboch; mu gu lufmed riy, ma bay mu pininged e sorok ngog.” 
Machane be ga’ar Got ngak e pi’in kireb, “Mang mat’awunmed ni ngam uned i yog e pi motochiyel rog, ara mang rogmed ni ngam weliyed murung’agen e m’ag rog? 
Ka mu siyeged e fonow rog; ka mu n’iged e tin kug ta’chiylen. 
Gubin e pi moro’ro’ ni gimed ra guy me mang fager romed, ma gimed ma m’agmed ngak e pi’in dar yul’yul’gad ko mabgol rorad. 
“Yigub puf langmed ko tin kireb; dariy e ngiyal’ ni gimed ma stuntun ko mululfith lugun’. 
Yigub ba’ud romed ni ngam gathibthib niged pibe’ romed ma gimed be pug thibngirad ngalang. 
Urngin e pin’ey ni kam rin’ed, ma ku gu th’ab gulungag, ere kam leam niged ni ta’ab rogog ngomed. Ma chiney e nggu puwan’ ngomed, mu gup’ e kireb romed nga owchemed. 
“Motoyilgad ko ren’ey, gimed e pi’in gimed be fekyathig, ya ri gu thang owchamed, ma dariy be’ nra ayuwegmed. 
Ogmagaer e ire re maligach nri ma tayfag, ma rib mich ni gu ra ayweg e pi’in yad ma fol rog.”