PSALMS.
56.
A Got, nge wurengan’um ngog, ya ke yib e cham ngog; pi to’ogor rog e yad be gafgow nigeg ni gubin ngiyal’. 
Pi togopluw rog e yad be cham ngog nni n’umngin e rran. Ri yad bo’or ni yad be cham ngog. 
A SOMOL ni Gubin ma Rayag Rok, nap’an nra yib e marus ngog, me gur e pagan’ rog. 
Be pagan’ug ngak Got ma da gur tamdag; gu be pining e sorok ngak ko n’en ke micheg. Ere mang e rayag ni nge rin’ ba girdi’ ngog? 
Pi to’ogor rog e yad be k’ar oloboch ngog ni polo’ e rran; yigu yad be leamnag kanawo’en ni ngar gafgow nigedgag! 
Yad be cheag ngu’ur pachgad, ngu’ur damit niged urngin e tin gu be rin’, ni yad be nameg ni ngar thanged e pogofan rog. 
A Got, mu gechig nagrad ko kireb rorad; mu waernag e picha’nem u fithik’ e damumuw rom! 
Gamnang feni gel e gafgow ni gu be tay; ka mu yoloy gubin gaf i lu’ag nike map’. Dariy u babyor rom ni ka mu yoloy? 
Rofen ni gu ra piningem, e ra cheal e pi to’ogor rog ngar sulod. Ya gu manang ni arrogon: Got e bay u ba’rog 
ni fare SOMOL ni gu ma pining e sorok ko pin’en ni micheg. 
Dab gu rus ya ir e ba pagan’ug ngak. Mang e rayag ni nge rin’ ba girdi’ ngog? 
A Got, bay gu pi’ ngom e n’en ni kug micheg; bay gu pi’ ngom e maligach rog ni ogmagaer, 
ya kam chuwegeg u pa’ e yam’, kam teg nda gu waer. Ma aram fan ni gu be yan u p’eowchen Got, u ram’en fare tamilang ko yafos.