PSALMS.
74.
A Got, mangfan ni kam n’agmad ni aray rogon? Mog, yug ra um par ni gab damumuw ko girdi’ rom ni dariy n’umngin nap’an? 
Mu tay u wun’um e girdi’ rom, ni mu mel’egrad kakrom ni ngar manged girdi’ rom, ni pi’in ni mu chuwegrad ko sib ngar manged birom e ganong. Mu tay’ u wun’um e Burey nu Zion, ni um par riy bingyal’. 
Man u daken gubin e tin ke mogothgoth’; pi to’ogor romad e kar gathayed gubin ban’en u Tempel. 
Pi to’ogor rom e kar garus niged e gel ni kar ted u Tempel rom; kar ted e flak rorad ngaram ni pow ko gel ni kar ted. 
Yad bod e pi tadimow ren ni yad be toy e gek’iy nga but’ ko tow rorad. 
Kar t’ared gubin e palang ko tow nge amma rorad. 
Kar bilged e Tempel rom kar paged e nifiy ngay; kar dariyfan niged e gin yima liyor ngom riy. 
Yad ba’adag ni ngar thirfed gamad u but; kar urfiyed nga but’ gubin yang nib thothup u lan e nam. 
Urngin e pow ni thothup romad e dakriy; ma de magach ta’reb e profet, ma dariy be’ ni manang n’umngin nap’an me mus e ran’ey. 
A Got, bu uw n’umngin nap’an ni ngi i minmin e pi to’ogor romad ngom? Ngu’ur dariy fanaged fithingam ni manemus? 
Mangfan ni kam siyeg ni ngam aywegmad? Mangfan ni kam m’ag pa’am nga ker’um? 
A Got, ya gur e pilung romad ko tobolingin i yib; bo’or yay ni kam ayuwegmad. 
Gelngim nib gel e mu ki’eg e day ngay, mag bilig lolugen fapi kan nu maday; 
mu bilig lolugen fare kan ni Leviathan mag pi’ ufin nge languy e gamanman nu ted. 
Kam tay e pi alublub nge pi athang’el ngi i map’; ma kam mliknag lan e pi lul’ ni gagang’. 
Gur e mu sunmeg e rran nge nep’; kam tay e yal’ nge pul nga tagil’. 
Gur e mu duwgiliy e yungin ni nge mus e fayleng riy; gur e mu tay ngilan’ e summer nge winter. 
A SOMOL, dabi m’ay u wun’um ni be minmin e pi to’ogor rom ngom, ni bogni’ ni dariyfam u wan’rad ma dubrad gur. 
Dab mu n’ag e girdi’ rom nike me’waer nga pa’ e pi to’ogor rorad ni kireb; dab mu pagtalin e girdi’ rom ni yibe gafgow nagrad! 
Mu tay u wun’um fare m’ag nim ngongliy u thildad. Bay e cham u gubin e tabthung u lan e nam. 
Dab mu pag e pi’in ni be gafgow ngan tamra’ nagrad; mu pag e pi’in gafgow nge pi’in bt’uf e ayuw rorad ngar pininged e sorok ngom. 
Got, mu sak’iy ngam bigbigiy e tirom! Mu leamnag e pi’in dariyfam u wun’rad ni yad be minmin ngom ni polo’ e rran. 
Dab mu pagtalin e pi tolul u fithik’ e damumuw ni be tay e pi to’ogor rom! Nge pi meyngar ni dertal ni be tay e pi tagopluw rom!