PSALMS.
86.
SOMOL, mu telim ngog, ngam fulweg lungug, ya dariy ban’en nrayag rog ma gub me’waer. 
Mu ayuwegneg u pa’ e yam’, ya gub yul’yul’ ngom; mu ayuwegneg, ya gag e tapigpig rom mma pagan’ug ngom. 
Mu runguyeg, ya gur e Got rog; gu be meybil ngom nib polo’ e rran. 
A Somol, mfal’eg laniyan’ e tapigpig rom, ni bochan e beyib e meybil rog ngom ngalang. 
Gur e gab gol ngomad ma ga ma n’agfan u wun’um e kireb romad, ma gubin e pi’in yad ma meybil ngom e yad ba sug ko fare t’ufeg rom ni dabimus. 
SOMOL, mu telim ko meybil rog; mu rung’ag e meyor rog ni gu be man ayuw. 
Gu be piningem ko yu ngiyal’ ni ku gu aw nga fithik’ e oloboch, ni bochan e ga ma fulweg taban e meybil rog. 
A Somol, dariy reb e got ni bod gur, ma dariy reb nike rin’ e n’en ni kam rin’. 
Gubin e nam ni kam sunmeg e bay rabad ngar siro’gad ngom, miyad pining e sorok nga fanam gil. 
Ya gur e rib gel gelngim ma ga ma ngongliy e maang’ang; kemus ni go’ gur e Got. 
SOMOL, mu fil ngog ko mang e ga ba’adag ni nggu rin’, ma bay ug fol rom u fithik’ e yul’yul’; mu fil ngog rogon ni nggu pigpig ngom u polo’ i lanin’ug. 
A Somol ni Got rog, bay gu pining e sorok ngom u polo’ i gumircha’eg; bay ggilnag fithingam ni dariy n’umning nap’an. 
Rib ga’ e t’ufeg rom ngog ni fare t’ufeg ni dabimus! Kam ayuwegneg u pa’ e yam’. 
A Got, girdi’ ni tolngan’ e karbad ni togopluw ngog; ma barba’ i girdi’ ni kireb e yad be guy rogon ni ngar thanged e pogofan rog, ni girdi’ ni dariyfam u wan’rad. 
Machane gur Somol e ga ba Got nri gama runguy ma bt’uf e girdi’ rom, gubin ngiyal’ ni ga ba gumaen’, gubin ngiyal’ ni ga ba gol ma ga ba yul’yul’. 
Mu cheal ngam sap ngog ngam runguyeg; mu pi’ gelngig ma ga ayuwegneg, ya gu be pigpig ngom nri bod ni i rin’ e chitinag. 
SOMOL, mu dag ngog e pow u fanam manigil; ma pi’in yad be fanenikayeg e bay ra tamra’gad nap’an ni yad ra guy ni ka mu ayuwegneg ka mu fal’eg lanin’ug.