PSALMS.
94.
SOMOL, I gur fare Got ni ga ma gechig; mu dag e damumuw rom! 
Gur e tapufthin romad ni gamad gubin; mu sak’iy ngam pi ngak e pi’in tolngan’ e n’en ni bay tapgin ni nge aw ngorad! 
Bu uw n’umngin nap’an ni ngi i felan’ e pi’in kireb? SOMOL, bu uw n’umngin nap’an? 
Bu uw n’umngin nap’an ni nge par e pi’in ma kar’ oloboch nib tolngan’rad; ma yad ba uf ko pi oloboch ni yad be ngongliy? 
SOMOL, kar pirdi’iyed e tirom e girdi’; ma yad be gafgownag e pi’in bmil farad ngom. 
Yad be thang e fan rok e pi’in ke yim figirngirad nge pi’in kanim’ rorad, ma yad be thang e pogofan rok e milekag ni yad be par u daken e but’ romad. 
Yad be ga’ar, “Der guydad SOMOL; fare Got rok yu Israel e dar na’ab.” 
Girdi’ rog, mang e gimed mrin’ ni gimed balyang ni minan’? Fin wi’in e nge mit ban’en ngomed? 
Got e ngongliy teldad, ere der rung’ag ban’en? Ma ir e ke sunumiy lan owchey, ere der guy ban’en? 
Ma puwan’ ko pi nam, ere dabi gechig nagrad? Ma ir e ma fil ban’en ko girdi’, ere dariy e llowan’ rok? 
SOMOL, e manang e n’en ni gadad be leamnag; manang fane bm’ayfan e tirorad e leam. 
SOMOL, ba felan’ e pi’in ga ma pow’iyrad, cha’ ni ga be machibnag ko motochiyel rom! 
Ga ma pi’ e toffan ngorad u tomuren fa pi rran ni ba gel e gafgow riy nge taw ko ngiyal’ ni kan ker ba low ni nge mul e pi’in kireb ngay. 
I SOMOL e dabi n’ag e girdi’ rok; ma dabi fek owchen ko pi’in nib milfarad ngak. 
Tin nib mat’aw e yira pir’eg bayay u lan tafen e puf oloboch; ma gubin e pi’in bmat’aw ma yad ra tedyad ngay. 
Mini’ e sak’iy ni pa’ag nge togopluw ko pi’in kireb? Mini’ e mang ngog ngug togopluwgow ngak e pi’in ma rin’ e kireb? 
Fa’an mang e de ayuwegneg SOMOL, ma kug wan ni papey ko fare binaw nib math gulngay riy. 
Mug ga’ar, “Ke sirgig eg”; machane SOMOL fare t’ufeg rom ni dabimus e ke duwgiliyeg. 
Yu ngiyal’ ni der paslagan’ug ma ke magafan’ug, ma ga fal’eg lanin’ug nggu felan’. 
Dabiyag ni ngam mang ngak e pi tayugang’ ni sasalap, ni yad ma uneg e tin nde mat’aw ngalan e motochiyel, 
pi’in yad ma makath nib togopluw ngak e pi’in ni bfel’ miyad turguy ni ngan thang e fan rok e pi’in bfel’ e rok. 
Machane SOMOL e n’ufegeg; Got rog e be yoror rog. 
Bayi gechig nagrad ko kireb rorad me thang owcharad ni bochan e denen rorad; I SOMOL ni Got rodad e bayi thirifrad u but’.