PSALMS.
103.
Lanin’ug, mu pining e sorok ngak SOMOL! Polo’ i gag, mu pining e sorok nga fithingan nib thothup! 
Lanin’ug, mu pining e sorok ngak SOMOL, ma dab mu pag talin feni gol. 
Ma n’ag fan u wan’ urngin e denen rog mma faseg urngin e liliy nike yib ngog; 
i talegeg ni dab gu wan ngalan e low ko yam’, ma ke tow’ath nigeg ko t’ufeg nge runguy. 
Ke yu’nag ngog e tin ni bfel’, ya nggu par ni ku gub pagel ma gub gel ni bod ba arche’ ni eagle. 
SOMOL e ma turguy e tin ni bfel’ ni fan ngak e pi’in yibe gafgow nagrad nge pi’ ngorad mat’awrad. 
Ke weliy ngak Moses e tin ke tanomnag’, me dag ko girdi’ nu Israel e maang’ang ni ngongliy. 
I SOMOL e rib marnguy ma ba ga’ e t’ufeg rok, ba sowath nma yib e damumuw ngak, ma ba sug ko t’ufeg ni dabimus. 
Der ma par ni yugub puwan’; ma der ma par nib damumuw ni dariy n’umngin nap’an. 
Der ma gechig nagdad nrogon nsusun e nge aw ngodad, ara fulweg puluwon e denen nge kireb rodad nrogon. 
Rogon feni tolang lanelang ko fayleng, e aram feni ga’ e t’ufeg rok SOMOL ko pi’in ni bay madgun u wun’rad. 
Rogon feni mal’af e ngek ko ngal, e aram feni mal’af nra chuweg e denen rodad rodad. 
Rogon feni gol ba matam ngak pifak, e aram rogon feni gol SOMOL ngak e pi’in bay madgun u wun’rad. 
Manang e n’en nni ngongliydad ngay; kamnang ni gadad e fiyath. 
Gadad e girdi’ nge n’umngin nap’an e yafos rodad e bod e pan, gadad ma ilal nge yan i mus nga fel’ngidad ni bod ba floras u fithik’ e pan. 
Me yib e nifeng i luf nga but’ ma aram e dab ku ni guy. 
Machane pi’in yad ma liyor ngak SOMOL e bay ur pired ni yad ba t’uf rok ndariy n’umngin nap’an, ma fel’ngin ngorad e bay i par ni gubin e mfen, 
ni pi’in yad be par ni yad ba yul’yul’ ko m’ag rok, ma yad be par ni yad ba tay u gil’ e tin keyog ni ngu’un rin’. 
I SOMOL e ke fal’eg tagil’ nga tharmiy; i ir e pilung ko gubin. 
Gimed e pi engel ni bay gelngimed nib gel, ni gimed be fol ko tin keyog ni ngu’un rin’, ma gimed ma rung’ag e tin nma yog, mu pininged e sorok ngak SOMOL! 
Mu pininged e sorok ngak SOMOL, gimed gubin piyu tharmiy ni bay gelngimed nib gel, ni gimed e pi tapigpig rok, ni gimed be rin’ e tin nib m’agan’ ngay! 
Gimed urngin e tin ni sunumiymed SOMOL, mu pininged e sorok ngak u gubin yang e yungi n’en ni be gagiyeg riy! Lanin’ug, mu pining e sorok ngak SOMOL!